Засгийн газрын өнөөдрийн хуралдаанаар элэгний Д вирусын халдварын тархалт, эмчилгээ, оношилгооны өнөөгийн байдал, цаашид авах арга хэмжээний талаар хэлэлцжээ. 

Эрүүл мэндийн сайд С.Чинзориг: 

-ДЭМБ-ын аргачлалаар авсан судалгаагаар манай улсад Д вирусийн халдвартай 66 мянган иргэн байх магадлалтай гэдэг бол төрийн бус байгууллага 150 мянган иргэн Д вирусээр өвчилсөн гэж ярьдаг. Харин ХӨСҮТ-д 3800 гаруй иргэн бүртгэлтэй байдаг. 

Дэлхийн эрүүл мэндийн байгууллагад зөвшөөрөгдсөн “Гепатит Д” вирусийн халдварыг эмчлэх цор ганц эмчилгээ бол интерферон эмчилгээ юм.

2024 оны эхэнд Эрүүл мэндийн сайд тушаал гаргаж, Монгол Улсад “Гепатит Д” вирусийн халдварын эмчилгээ, эмнэлзүйн зааврыг баталсан. Энэ заавартай ДЭМБ-аас танилцаж, интерфероны эмчилгээг Монгол Улсад хийхийг зөвшөөрсөн. Нөгөө талаас ДЭМБ хараахан зөвшөөрөл олгоогүй байгаа боловч ОХУ дотооддоо эмчилгээндээ хэрэглэж байгаа милкулетс эм, мөн Европын холбоонд бүртгэгдсэн АНУ-д үйлдвэрлэгдэж байгаа эмийг “Гепатит Д” вирусийн эсрэг эмчилгээнд ашиглах эмнэлзүйн аргыг Эрүүл мэндийн сайд тушаалаар баталсан байгаа. 

ДЭМБ-д зөвшөөрөгдсөн “Гепатит Д” вирусийн халдварыг эмчлэх интерферон эмчилгээг хүлээн зөвшөөрөхгүй, гаж нөлөө өндөртэй гэж үздэг иргэд, ТББ-ын төлөөлөл үзсэн. Ингээд худалдан авах тендерийг түр зогсоочихоод байна. 

Хоёр дахь гарц нь анх ОХУ–аас гаргасан эм, тус улс уг эмийг хэрэглэх эрхээ АНУ-д худалдсан. Худалдахдаа бусад улс орнуудад импортлох зөвшөөрлийг олгоогүй, зөвхөн дотооддоо хэрэглэх зөвшөөрөлтэйгөөр патентаа худалдсан байдаг.

Өнгөрсөн хоёрдугаар сарын 15-17-ны өдрүүдэд ОХУ-ын Эрүүл мэндийн сайд Михайл Мурашкотой Улаан-Үд хотноо уулзалт хийсэн. Хэлэлцээрийн хүрээнд шийдэлд хүрсэн нэг асуудал нь гепатитын Д вирусийн халдвартай иргэдийг Буриадад эмчлэхээр болсон.

Энэ эм харьцангуй өндөр үнэтэй. Сарынх нь эмийн хэрэглээний үнэ 160 мянган рублиэс 170 мянган рублийн үнэтэй. Хэлэлцээрийн шатанд эмийн үнийг 25 мянга орчим рублиэр бууруулж, 145 мянган рубль байх боломжтой гэж урьдчилан үнийн санал дээр тогтсон.

АНУ–ын Галякси компанитай цахимаар олон удаагийн уулзалт хийж эмийг эмчилгээнд хэрэглэх талаар хэлцэл хийж байна.

Манай улсад энэ эмийг бүртгээгүй байгаа ч Европын холбоо энэ эмийг эмчилгээнд хэрэглэхийг зөвшөөрч бүртгэсэн байдаг учраас хэрэглэж болох юм байна гэж үзсэн.

Сарынх нь эмийн хэрэглээний үнэ 10-12 мянган ам.доллар. Эмийн үнийн талаар АНУ-тай хэлцэл хийж байна. Европын холбоонд зарагдаж байгаа үнээс 8 дахин доогуур үнэтэй байх хэлцэл хийж байна. Дундын зуучлалгүйгээр шууд ХӨСҮТ-д нийлүүлж эмчилгээнд хэрэглэнэ. Энэ асуудлыг Засгийн газрын өнөөдрийн хуралдаанд танилцууллаа.

Мэдээллийг сонсоод олон мянган иргэний асуудал байгаа учраас Д вирусийн эмчилгээг яаралтай эхлүүлэх ёстой гэдэг зөвлөмж өгсөн. Цаашдаа бид хоёр арга хэмжээг авна. Нэг дэх нь АНУ-ын Гелакцск компанийн эмийг дотоодын эмчилгээнд хэрэглэх тохиолдолд гааль болон НӨАТ -аас чөлөөлөх шаардлагатай. Эмчилгээний зардал бууруулах боломж бүрдэнэ. Ирэх долоо хоногийн Байнгын хорооны хуралдаанаар Эрүүл мэндийн сайдын хувиар мэдээлэл хийнэ. Засгийн газарт чиглэл өгөх тогтоол баталж өгөөч ээ.

Өртөг өндөртэй, Д вирусээр өвчилсөн иргэдийн дийлэнх нь ахмад настнууд байна. Тэтгэврээс өөр орлогогүй учраас хөнгөлөлт чухал. Эрүүл мэндийн тухай хуульд халдварт өвчний Д вирусийн эмчилгээний зардлыг төр хариуцах, шаардлагатай төсвийг төсөвт суулгах тогтоолыг баталж өгөөч ээ гэдэг хүсэлт гаргасан. Дэмжинэ гэж найдаж байна гэв. 

 

---