ЦЕГ-ын Тээврийн цагдаагийн албанаас Хан-Уул дүүргийн 8 дугаар хорооны нутаг дэвсгэр “Чингис хаан” олон улсын нисэх буудал хүртэлх тууш замын нөхцөл байдлын мэдээллийг хүргэлээ.

Өнөө өглөө Улаанбаатар хотод их хэмжээний цас орж, цасан шуурга шуурсны улмаас тус замын харагдах нөхцөл байдал хязгаарлагдаж, 17 машин мөргөлдсөн зам тээврийн ноцтой осол гарсан юм. Уг зам тээврийн ослын улмаас тус замыг хаагаад байсан бол 11 цагийн байдлаар нээсэн гэдгийг ТЦА-наас хэллээ. 

-3 дугаар сарын 27-ны өглөө 08:20 цагт нисэх онгоц хүрэх тууш зам дээр олон тооны машин мөргөлдсөн гэх дуудлага мэдээлэл Цагдаагийн байгууллагад ирсэн. Уг дуудлагын дагуу Тээврийн цагдаагийн албаны шуурхай удирдлагын баг хэргийн газрын үзлэгийг хийж, зорчих хэсгийг чөлөөлөх арга хэмжээг авч ажиллаа. “Чингис хаан” олон улсын нисэх буудлын түргэн тусламжийн эмнэлэгт гэмтсэн иргэдийг хүргэсэн. Одоогийн байдлаар хэчнээн иргэн гэмтсэн нь тодорхойгүй байна. Ослын шалтгаан нөхцөл үзэгдэх орчин хангалтгүйгээс болсон эсэх, жолоочийн буруутай үйл ажиллагаанаас шалтгаалсан уу гэдгийг шалгалтын ажиллагаа дууссаны дараа тодорхой болно гэлээ.

Дархан, Эрдэнэт, Сэлэнгийн замын нөхцөл байдал хүндхэн, шуурганы улмаас үзэгдэх орчин хангалтгүй байгаа тул иргэд онцын шаардлагагүй бол тус замаар зорчихгүй байхыг анхааруулж байна.

---