Европын Холбооны хууль сахиулах байгууллага болох Европын Комиссоос “Apple” компанийг Европын холбооны өрсөлдөөний хууль (монополын эсрэг хууль) зөрчсөн гэж үзэн, хоёр тэрбум ам.доллартой тэнцэх хэмжээгээр торгоно гэж өчигдөр  мэдэгдлээ. Үүний үр дүнд, Apple компанийн хувьцаа АНУ-ын хөрөнгийн зах зээл дээр өдөртөө 3 хувиар буурч, сүүлийн дөрвөн сарын хугацаанд хамгийн доод түвшинд хүрсэн байна.

Тухайлбал, Apple компанийн хувьцааны үнэ 175 ам.доллар хүртэл буурч, өнгөрсөн оны 11 сарын эхэн үеэс хойших хамгийн доод үзүүлэлт болжээ.

Европын Комиссоос Apple компани нь хэрэглэгчдэдээ өөрсдийн аппликейшнээс (Applestore) гадуур хямд хөгжим сонсох үйлчилгээ авах боломжтой гэх мэдээллийг нууж, энэ тухай мэдээллийг тараахыг хориглосон болохыг тогтоожээ. Үүнд, тус компанийг Европын Комиссын өрсөлдөөний тухай хуулийг зөрчсөн гэж үзэн 1.8 тэрбум гаруй еврогийн торгууль ногдуулсан байна.

Түүнчлэн, Европын комиссын мэдээлснээр Apple компани хөгжим сонсох аппликейшн хөгжүүлэгчидтэй өрсөлдөж, iPhone хэрэглэгчдэд "хямдхан" хөгжим сонсох үйлчилгээний талаар мэдээлэл өгөхөөс сэргийлж мэдээллүүдэд "хязгаарлалт" тавьсан нь өрсөлдөөнд шударга бус хандаж саад учруулсан гэж үзэж байгаа юм байна. Apple-ийн хөгжмийн аппликейшн дээрх өрсөлдөөн арав гаруй жилийн турш үргэлжилж байгаа бөгөөд, үүний үр дүнд Apple-ийн өөрсдийн аппликейшн дээрх худалдан авалтын 30 хувийн шимтгэлээс болж хэрэглэгчид хөгжим сонсох үйлчилгээнд өндөр төлбөр төлөхөөс өөр аргагүй болжээ.

Энэ нь Apple компанийн хувьд Европын холбооны өрсөлдөөний тухай хуулийг зөрчсөн анх удаагийн торгууль болж байгаа юм. Гэвч, Apple компани Европын комиссын шийдвэрийг эсэргүүцэж, "Хэрэглэгчдэд хохирол учруулсан нотолгоо олдоогүй байхад торгууль ногдуулсан" хэмээн Европын Комиссын шийдвэрийг давж заалдахаа мэдэгдлээ.

Эх сурвалж: NHK, Yahoo News 

---