Төрийн шагналт, Соёлын гавьяат зүтгэлтэн Ш.Гүрбазарын зохиол, найруулагч Б.Батдэлгэрийн бүтээл “Шар гэгээ” уран сайхны кино өнгөрсөн намар нээлтээ хийсэн билээ. 

"Оранж энтертайнмент", "Рэд Пойнт медиа", "Промикс саунд”-ын хамтын энэхүү кино нь монгол ахуй, ёс заншил, яруу сайхан үг хэллэгээр баялаг, хожим алтан үеийн кино гэж хэлэгдэх чанартай уран бүтээл болж чадсан гэж үзэгчид төдийгүй мэргэжил нэгтнүүдээс өндөр үнэлгээ аваад байгаа юм. Улмаар 15 дахь удаагийн "Улаанбаатар” олон улсын кино наадмын шилдэг гурван төрөлд чансаагаараа тэргүүлж, "Шилдэг кино зохиол", "Шилдэг туслах эмэгтэй дүр", "Шилдэг хөгжмийн зохиол" гэсэн гурван төрөлд шалгарч, "Хангарьд цом"-ын эзэн болсон юм.

Кино театруудын дэлгэцнээ олон сар амжилтаа хадгалж, олон мянган хүний хүртээл болсон тус уран сайхны кино IPTV-д байршсанаар одоогоор "хамгийн их үзсэн" бүтээлээр нэрлэгдээд байгаа аж. Мөн, Монгол, Герман улсын хооронд дипломат харилцаа тогтоосны 50 жилийн ойн өдрүүдэд улсаа сурталчлах гурван киноны нэгээр “Шар гэгээ” сонгогджээ. 

---