УИХ-ын гишүүн, Аюулгүй байдал гадаад бодлогын байнгын хорооны дарга Б.Энх-Амгалан, Монгол Улсын Ерөнхийлөгчийн Тамгын газрын дарга З.Энхболд нарт холбогдох хэргийг өнөөдөр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхэд шүүсэн юм.

Гэвч ЕТГ-ын дарга асан З.Энхболд шинээр өмгөөлөгч авч, өмгөөлөгч нь хавтаст хэрэгтэйгээ танилцах болсонтой холбоотойгоор шүүх хурлыг хойшлуулж, энэ сарын 29-ний өдөр товложээ. Өмнө нь дээрх хэргийн шүүх хуралд ЗТХЯ-ны Авто замын бодлогын хэрэгжилтийг зохицуулах газрын дарга Д.Доржханд гэрчээр оролцоогүйгээс хойшлуулж байсан юм.

УИХ-ын гишүүн Б.Энх-Амгаланг “Страто” ХХК-д давуу байдал бий болгосон гэж буруутгасан бол З.Энхболдыг ЕТГ-ын даргаар ажиллаж байхдаа Зам тээврийн хөгжлийн сайд Б.Энх-Амгаланд нөлөөлсөн, албан тушаалаа урвуулан ашигласан хэмээн прокурорын байгууллага яллагдагчаар татаад байна. 

---