Монголын олон улсын ба үндэсний спортын Арбитрын дэргэдэх допингийн давж заалдах комисс ирэх сарын сүүлээр дахин хуралдахаар болжээ. Гэхдээ М.Бадарчийн хүсэлтээр хаалттай хуралдаж, шийдвэрээ нууцалахаар болсон гэх мэдээлэл байна. 

Монголын олон улсын ба үндэсний спортын Арбитрын дэргэдэх допингийн давж заалдах комиссын хуралдаан өнөөдөр болох хуваарьтай байсан. Тус хуралдаанаар Улсын арслан М.Бадарчийн барилдах эрхийг сэргээх асуудлыг хэлэлцэх товтой байсан юм. Тэгвэл тус хуралдаан ирэх сарын сүүлээр хуралдахаар болжээ. Гэхдээ М.Бадарчийн хүсэлтээр хаалттай хуралдаж, шийдвэрээ нууцалахаар болжээ. 

Улсын баяр наадамд ес даван түрүүлсэн улсын арслан М.Бадарчийг сэргээшийн төрлийн бодис хэрэглэсэн гэсэн дүгнэлт гарсан. Үндэсний бөхийн салбарын хороо 2023 оны есдүгээр сарын 26-нд хуралдаж, түүний барилдах эрхийг дөрвөн жилээр хасах санал гаргаж, Монгол Улсын ерөнхийлөгчид уламжлаад байгаа юм.

Харин улсын арслан М.Бадарч Үндэсний бөхийн салбарын хорооны тогтоолыг хүчингүй болгуулахаар Монголын олон улсын ба үндэсний спортын Арбитрын дэргэдэх допингийн давж заалдах комисст хандаад байгаа юм.

М.Бадарч допинг хэрэглэсэн, хэрэглээгүй гэдэг дээр гомдол гаргаагүй, харин шинжилгээ авахдаа хууль хүчний байгууллагаас байлцсан нь олон улсын хууль зөрчсөн гэдгээр маргаан үүсгэсэн юм.

---