НИТХ дахь Хүн намын бүлгээс нийслэлд болж буй нийтийн тээврийн асуудал болон энэ долоо хоногт нийслэлд шийдвэрлэгдэх асуудлын талаар байр сууриа илэрхийлж мэдээлэл өгөв.

НИХТ дахь Хүн намын бүлгийн дарга Д.Гантулга:

-Үндсэндээ Монгол Улсын нийслэл Улаанбаатар хот маань хуультай болсон. Ямар хууль вэ гэвэл Түгжрэлийг бууруулах, гэр хорооллыг орон сууцжуулах гэдэг хуультай болсон. Улмаар энэ хуулийн дагуу Нийслэлийн Засаг дарга Х.Нямбаатарын мэдэгдэж буйгаар 16 журам батлагдан гэж байгаа. Энэ 16 журмаас ес нь нөгөөдрийн /2024.01.25/ НИТХ-аар орж, өргөн баригдах тов гарчихаад байна. Мөн өнгөрсөн амралтын өдрүүдэд автобусны чиглэлийг өөрчилсөн шийдвэр гаргаж, хоёр хоногийн дараа буцаасан. 101 чиглэл байсан бол 71 чиглэлийг сэргээгээд 34 чиглэлийг хэвээр үлдээсэн.

Энэ бүхнийг дүгнэж хэлэхэд НИТХ-аар гаргах гэж байгаа шийдвэрүүд, Засаг дарга Х.Нямбаатарын гаргаж байгаа шийдвэрүүд маш буруу, дутуу байна. Ямар ч судалгаа тооцоогүй байна. Иргэдэд урьдчилан мэдэгдэлгүй шууд шийдвэрлэж байна. 

Тухайлбал, Нийслэлийн нийтийн тээврийн сан байгуулах гэж байгаа. Энэ санг байгуулах хэрэгтэй юу гэвэл хэрэгтэй. Гэхдээ энэ сангаас жилд хэдэн төгрөг цугларах юм. Арван жилд хэдэн төгрөг цуглах юм. Түүнийгээ хэрхэн зарцуулах юм гэсэн тоо байх хэрэгтэй. Гэвч энэ журамд ямар ч тоо алга. Санхүүгийн юм ярьж байж дандаа үгээр бичээд байгаа. Энэ журамд хуульчид бус санхүүгийн мэргэжилтнүүд нь бас ажиллах хэрэгтэй байна. Ингэж санхүүгийн тооцоолол гаргаж болохгүй. 

Мөн 730 мянган төгрөгөөр нийслэлд явж байгаа автотээврийн дугаарыг хязгаарлана гэж өөрсдөө ил тод ярьж байгаа юм. Улаанбаатарын дугаарыг 9911 шиг болгоно гэж ярьж байна. 9911 дугаар үнэд ороод Монгол Улсад ямар гавьяа байгуулсан юм. Нийслэлд Х.Нямбаатар өөрөө дугаарын бизнес хийх гээд байна уу гэхчлэн иргэдийн эрхийг зөрчсөн олон асуудал байна.

Иймд ХҮН намыг бүлгээс Х.Нямбаатар өргөн барьсан хэрэгтэй асуудлаа хэрэгжүүлж, ямар ч хэрэггүй хүний эрх зөрчсөн асуудлаа татаж авах хэрэгтэй гэдэг байр суурьтай байна гэв. 

---