МАН-ын гишүүд дэмжигчдийн "Ардын хүч" холбооноос ногоон автобус, БЗС, Хөгжлийн банк, нүүрсний гэх зэрэг дуулиант хэргүүд болон кабинетын зарчмаар ажиллаж чаддаггүй сайд нарт хариуцлага тооцож МАН-ын гишүүнчлэлээс хасах шаардлагад гарын үсгийг цуглуулж эхэлжээ. Улмаар тус шаардлагаа МАН-ын удирдлагууд болон Хяналын ерөнхий хороонд өргөн барих юм байна. 

"Ардын хүч" холбооны гишүүн Б.Цогтгэрэл:

-MEC судалгааны байгууллагаас улс төрийн намуудын рейтингийг тогтоох судалгааг сар бүр гаргадаг. Тус судалгаагаар МАН-ын рейтинг үргэлж буурсан үзүүлэлттэй гарчээ. Энэ судалгааны дүнг харахаар 2024 оны сонгуулийн тогтолцоогоор 48 хүний жагсаалтад МАН 8-9 суудал, тойрог гэж авч үзвэл арван хүний хоёр нь ялахаар харагдаж байна. Намын рейтинг 19 хувьтай байна. Ардчилсан нам бас манайхаас ялгаагүй 4 функтээр бага байна. Улс төрийн намуудын рейтинг маш муу байна. Улс төрд оролцохгүй, цагаан сонгууль өгнө гэсэн хүмүүс судалгаанд оролцогчдын 35 хувийг эзэлж байна. Энэ тоо өсөөд л байна. Хүн намын рейтинг 8-13 хувийн хооронд тогтвортой байна.

Манай "Ардын хүч" холбооноос мэдрэлгүй, мэдрэмжгүй мангар тэнэг хүн байгаа биш судалгааны дүнгээ хараад олон нийтийн дунд гараад байгаа намын нэр хүндээ сэргээхийг хүсэж байна. УИХ-ын дарга ч чуулганы хуралдааны хаалт дээр хэлсэн. Маш олон асуудал гараад байгаа ч хариуцлага тооцсон асуудал алга гэж хэлсэн. Тэр үгтэй би 100 хувь санал нэг байгаа. Тухайлбал, Боловсролын зээлийн асуудал. Энэ асуудалд хэнд ямар хариуцлага тооцов. Ногоон автобусны хэрэг байна. Хэн ч ямар ч хариуцлага тооцоогүй байсаар байна. Манай намын дүрэмд авлига албан тушаалтны хэрэгт яллагдагчаар татагдвал намын гишүүнчлэлээс чөлөөлнө гэсэн заалт байгаа. Дүрэм маань огт хэрэгжихгүй байна. Хяналтын ерөнхий хороо үүнд анхаарч ажиллах ёстой. Гэхдээ юу хийгээд байгааг гайхаад байна. Судалгааны дүнгээ хар, олон нийт иргэдтэйгээ уулз. Иргэд юунд бухимдаад байгааг мэдэр. Хариуцлага тооцож байгаа асуудал огт алга.

Дараагийн асуудал Хөрөнгө оруулалтын тухай хуулийг сая хэлэлцлээ. Манай нам дотор Эенкотой ан мана үзэлцэх хүн Ч.Хүрэлбаатар юм билээ. Бусад нь айгаад туулай. Дуугарч байгаа ч хүн алга. Надад болон намын гишүүд олон нийтэд нэг зүйл муухай харагдсан. Тэр нь Засгийн газрын гишүүд кабинетын зарчимгүй ажиллаж байгаа, өөрсдийн нэр хүндээ олж авахын тулд өргөн барьсан хуулиа унагаж байгаа нь үнэхээр муухай харагдсан. Нэр бүхий хүмүүс утгагүй популизм хийсэн гэв. 

---