УИХ-ын гишүүн А.Адъяасүрэн УИХ-ын дарга Г.Занданшатарыг Үндсэн хуулийн цэцэд өглөө. Тодруулбал, УИХ-аар хэлэлцэгдэж байгаа Хөрөнгө оруулалтын тухай хууль нь Монгол Улсын Үндсэн хууль, Монгол Улсын хууль тогтоомжийн тухай хууль, үндэсний аюулгүй байдлын зөвлөмжтэй зөрчилдөж, алдаатай хуулийг хэлэлцүүлж байгаа учраас ийнхүү гомдол гаргаж байна гэлээ.

УИХ-ын гишүүн А.Адъяасүрэн:

-УИХ өөрөө хуулиа л дээдлэхгүй байна. Энэ оны нэгдүгээр сарын 11-нээс эхлэн хэлэлцэгдэж эхэлсэн Хөрөнгө оруулалтын тухай хууль нь нийгэмд нэлээдгүй маргаан дэгдээгээд байна. Иргэд ч үүнд бухимдлаа илэрхийлсээр байна. УИХ-ын гишүүн, иргэн хүнийхээ хувьд энэ хууль нь хуулийн зөрчилтэй, бүрдэл болоогүй гэж үзэж УИХ-ын дарга Г.Занданшатарыг Үндсэн хуулийн цэцэд өгч байна. Монгол Улсын Үндсэн хууль, Монгол Улсын хууль тогтоомжийн тухай хууль, үндэсний аюулгүй байдлын зөвлөмжтэй зөрчилдөж, алдаатай хуулийг хэлэлцүүлж байгаа учраас ийнхүү гомдол гаргаж байна.

Тодруулбал, Үндсэн хуулийн 25.7 дугаар заалтад Засгийн газар үндэсний аюулгүй байдлын бодлогод нийцүүлэн Засгийн газрын үйл ажиллагааны мөрийн хөтөлбөр тусгагдана гэж заасан. Хөрөнгө оруулалтын тухай хууль 7 бүлэг 33 зүйл заалттай орж ирж байгаа. 2013 оны хуультай харьцуулахад амьдралд нийцсэн, боловсронгуй болж орж ирэх ёстой. Гэтэл бүр дордуулаад ороод ирчихсэн байгаа юм. Тухайлбал, зургаадугаар бүлэг дээр гадаадын хөрөнгө оруулалттай төрийн өмчит компаниудыг зохицуулах зохицуулалтыг ор тас ор тас алга болгочихсон байгаа юм. Ингэсэн нь үндэсний аюулгүй байдлын бодлогод нийцэхгүй байна. Ийм учраас энэ хууль маш ноцтой үр дагавар гаргах учраас ийнхүү Цэцэд хандаж байна. Тэрнээс УИХ-ын дарга Г.Занданшатар, сайд Ч.Хүрэлбаатартай хувийн ямар нэг асуудал байхгүй гэдгийг хэлмээр байна.

---