Аялал жуулчлалын салбарын улирлын хамаарлыг бууруулах, өвлийн улирлыг уртасгах, жуулчдын урсгалыг нэмэгдүүлэх зорилготой  “Мазаалай” олон улсын мөсний наадам өнөөдөр эхэлнэ. 

"Мазаалай мөсөн хотхон”-д өнгөрсөн онд бүртгэгдсэн 52 мазаалайн мөсөн баримал, 50 метр урт гулсуур, мөн 12 метр өргөн, 22 метр урттай, нэг цагт хамгийн олон хүн гулгах мөсөн гулсуур, 56.4 метр урт цас мөсөн баримал зэрэг олон бүтээл байрлуулжээ. Мөсөн хотхонд 400-500 хүн хүлээн авах хүчин чадалтай, 4000 ам метр талбайг хамарсан онцлогтой.

Өвлийн аялал жуулчлалыг хөгжүүлэх ажлын хүрээнд тус хотхоныг бүтээж, өвлийн наадам зохион байгуулж байгаа бөгөөд гол үзмэр нь эх мазаалай ба түүний бамбаруушуудыг дүрсэлсэн 5 метр өндөртэй цас мөсөн баримал юм. Мөн нэг цагт хамгийн олон хүн мөсөн гулсуураар гулгасан Гиннесийн дээд амжилтыг Монгол Улсаас тогтоох зорилго тавиад байгаа билээ.

“Мазаалай” мөсөн цогцолборт энэ сарын 14-28 хүртэл өдөр бүр урлаг, соёл, спортын арга хэмжээг зохион байгуулах бөгөөд иргэдэд үнэ төлбөргүй үйлчих юм байна.

---