УИХ-ын чуулганаар Хөрөнгө оруулалтын тухай хуульд оруулах нэмэлт өөрчлөлтийн төслийг хэлэлцэж эхлээд байна. Энэ хүрээнд УИХ-ын дэд дарга С.Одонтуяагийн байр суурийг сонслоо.

Тэрбээр "Хөрөнгө оруулалтын тухай хуулийг дэмжиж, хурдан батлагдаасай гэж бодож байна. Монголд гадаадын хөрөнгө оруулалт буурч, ажиллах хүчин ч багассан. 2013 онд хөрөнгө оруулалтын хууль дээр ажиллаж байсан. Өдий хүртэлх хугацаанд зүйл заалт нь тааламжтай байсан ч төдийлөн үр дүнгээ өгөөгүй. Тэгэхээр асуудал юундаа байгааг судлах хэрэгтэй. Гадаадын хөрөнгө оруулагчид буцаагаад хөрөнгөө татаж буй шалтгаан нь хуулийн асуудал тулгараад шүүх дээр очиход хүндрэл үүсдэг. Гэрээний биелэлт байдаггүй гэх мэт зүйлс байдаг. Хурдан энэ асуудлыг шийдэхгүй бол гадаад дотоод ямар ч хөрөнгө оруулалт байхгүй боллоо.

Хуулийн 6 дугаар зүйлийн 13 дах заалт дээр ажиллах хүчнийг татваргүй оруулах ёстой гэснийг засах хэрэгтэй. Энэ дээр салбар заах хэрэгтэй. Уул уурхай, ЖДҮ дээр ажиллах ялгаатай. Монголчуудын ажиллах хүчин хомс салбарт татваргүйгээр ажиллах хүчин оруулах хэрэгтэй" гэв.

---