УИХ-ын намрын нэгдсэн чуулганы ээлжит хуралдаан Төрийн ордонд эхэллээ. 

Өнөөдрийн хуралдаанаар Нийгмийн эрүүл мэндийн тусламж үйлчилгээний хуулийн төсөл, Төрийн үйлчилгээг цахимаар үзүүлэхтэй холбогдуулан хууль хоорондын давхардал, хийдлийг арилгах 115 нэмэлт, өөрчлөлтийг батална. 

Мөн Элчин сайд нарыг эргүүлэн татах, томилох асуудлаар зөвшилцөх тухай Ерөнхийлөгчийн өргөн мэдүүлсэн санал болон Найрамдах Узбекистан Улсад Монгол Улсын Элчин Сайдын яам байгуулах асуудлыг хэлэлцэх юм. 

Хуралдаан эхлэхээс өмнө гишүүд үг хэлэв. 

УИХ-ын гишүүн Ш.Адьшаа:

-Эрх баригчдын зарим үйлдэл хэрээс хэтэрч байна. Бүсчилсэн хөгжлийн бодлогоо тодорхойлох нь зөв. Гэхдээ хэдэн Төрийн захиргааны байгууллагын орон нутаг руу шилжүүлнэ гэдгийг ойлгохгүй байна. Цаг үеэ олсон асуудалдаа анхаарлаа хандуулах шаардлагатай байна. Зуд, шүүхийн асуудал, нүүрсний сонсголын асуудлаа яаралтай хэлэлцмээр байна. Халзан бүргэдтэйн асуудлаар ерөнхий сайдад асуулга тавьсан. Жил өнгөрөөд байна. Яагаад оруулж ирэхгүй ингээд удаашруулаад байна вэ?

 УИХ-ын гишүүн Б.Пүрэвдорж:

-Өдрөөс өдөрт иргэд ядуурч байна. 50 мянган төгрөгийн үнэтэй гурил 140 мянга болчихоод байна. Иргэдийн орлогыг нэмэгдүүлэх тал дээр Засгийн газраас юу ч хийж хэрэгжүүлэхгүй байна. Иргэдийн цалин тэтгэвэр огт хүрэлцэхгүйгээс шалтгаалаад зээл ихээр авч байна. Эрдэнэс Тавантолгой 3.3 их наяд төгрөгийн цэвэр ашигтай ажилласан. Иймд энэ мөнгөнөөсөө иргэддээ олгомоор байна. 580 мянган төгрөгийн ногдол ашгийг тараахыг шаардаж байна. Хэрвээ өгөхгүй бол 1000 ам.доллар өгөх хэрэгтэй болно шүү гэв. 

---