УИХ-ын өнөөдрийн чуулганаар Хөрөнгө оруулалтын тухай хуульд өөрчлөлт оруулах асуудлыг хэлэлцэх эсэх дээр УИХ-ын гишүүд байр сууриа илэрхийллээ. Хөрөнгө оруулалтын тухай хуулийн 16.1.1-т “Газрыг 15-60 хүртэл жилээр гэрээний үндсэн дээр ашиглуулах, уг хугацааг гэрээний анхны нөхцөлөөр нэг удаа 40 хүртэл жилээр сунгах” гэсэн заалт тусгасан нь улс төрчдийг талцуулаад байгаа билээ.

УИХ-ын гишүүн Т.Доржханд:

-Хөрөнгө оруулалтын тухай хуулийг өнөөдөр үргэлжлүүлэн хэлэлцэхгүй бол гадаадын хөрөнгө оруулагч нарт маш буруу дохио очно. Нэг удаа хойшлуулсан. Хоёр дахь удаагаа хойшлуулбал, Монгол Улсын Их хурал, Засгийн газар гадаадын хөрөнгө оруулагч нарыг дэмжихгүй байна гэдэг сигнал тэдэнд очно шүү. Тэгэхээр хэлэлцэх хэрэгтэй.

Эдийн засгийн талаас нь хоёр, гурван зүйл хэлье. Монгол Улс хөгжихийн тулд дэд бүтэц хэрэгтэй. Хөгжлийн санхүүжилт хэрэгтэй. Хөгжлийн санхүүжилтийн гурван хүчин зүйл байгаа. Нэгдүгээрт улсын төсөв, хоёрдугаарт гадаадын зээл, гуравдугаарт хөрөнгө оруулалт. Улсын төсөв алдагдалтай, гадаадын зээл нь өрийн хязгаар давчихсан. Дараагийн нэг суваг нь хөрөнгө оруулалт юм.

Өчигдөр жиргээнд 860 гаруй залуучууд, мэргэжилтнүүд орж ирж санал бодлоо солилцсон. Тэр дотор Монгол Улсын Ерөнхий сайд байсан М.Энхсайхан гуай орж ирж, саналаа хэлсэн. Тэрээр УИХ-ын гишүүдэд нэг зүйлийг хэлж өгч, ойлгуулаач ээ гэж байна лээ. Гадаадын хөрөнгө оруулалт нь хэзээ ч өр үүсгэдэггүй юм гэж. Тэгэхээр өрийн дарамт байхгүй. Хоёрдугаарт, шинэ зах зээлийг бий болгодог. Гуравдугаарт, ажлын байр бий болгодог. Дөрөвдүгээрт, шинэ технологи, нөү-хау бий болгодог гээд маш олон давуу талтай. Ийм болохоор бидэнд гадаадын хөрөнгө оруулалт маш их хэрэгтэй. Яагаад гэхээр бид хөгжиж буй орон.

Тэгэхээр энд сууж байгаа хүмүүс өнөөдөр асуудлыг эцэслэх хэрэгтэй. АН-ыг дэмжих байх гэж бодож байна. Барууны үзэл баримтлалтай намын хувьд дэмжих байх гэж найдаж байна. Хөрөнгө оруулагч нарыг дэмждэг барууны үзэл баримтлалтай ийм нам хэрэгтэй.

МАН ирцээ бүрдүүлээд энэ асуудлаа шийдэх хэрэгтэй. Энэ бол та нарын үүрэг шүү. Хэрэв энэ үүргээ биелүүлэхгүй бол ХҮН нам хариуцлага тооцно гэдгийг хэлье гэв. 

---