УИХ-ын намрын нэгдсэн чуулганы өнөөдрийн хуралдаанаар Хөрөнгө оруулалтын тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслийг хэлэлцэх эсэх асуудлыг хэлэлцэж байна. Энэ үеэр УИХ-ын гишүүн Х.Болорчулуун тус хуулийн төслийг санаачилсан Ч.Хүрэлбаатар сайдыг Оюутолгойн бүтээгдэхүүн зарсан мөнгө төв банкаар дамжуулах хуулийг унагаасан буруутан гэж хэлэв. 

УИХ-ын гишүүн Х.Болорчулуун:

-Монгол Улсад үйлчилж байгаа хөрөнгө оруулалтын хууль муу гэж би үзэхгүй байна. Олон хүчин зүйлээс шалтгаалаад гадаадын хөрөнгө оруулалт манай улсад орж ирэхгүй байгаа. Хууль шинэчлээд л сайжирна гэж бодохгүй байна. 1 сая төгрөгөөр хөрөнгө оруулаад оршин суух эрх нь үүсэх нь энгийн зүйл юм уу? Гадаадын хөрөнгө оруулагчид нэг удаа газар эзэмшүүлээд хугацаа нь багасаад явах хэрэгтэй байх. Манайх шиг жижиг улс дархлаатай байх хэрэгтэй.

Оюутолгой ХК-ийг зээл зуучлагч, мөнгө хүүлэгч гэж хэлэхээр байна. Монгол Улс 2040 он хүртэл ашиг авахааргүй байна. Төсвийн 30 хувийг бүрдүүлэх том орд атлаа өнөөдөр 3 хувьд ч хүрч чадахгүй төсөв бүрдүүлж байна. Алт зэс баялгийг зарсан мөнгө монголын банкаар дамжихгүй байна. Үүнийг луйвар гэхээс яахын.

Ц.Даваасүрэн гишүүний санаачилсан хуулийг Ч.Хүрэлбаатар хууль зөрчин унагаасан. Ингээд Монголбанкаар Оюутолгойн бүтээгдэхүүнийг борлуулсан мөнгө орж ирэх хууль унасан. Худлаа гэвэл намайг хуулийг байгууллагаар шалгуулаарай.

Ч.Хүрэлбаатар сайд Оюутолгойн муу гэрээг сайжруулахын төлөө явж байгаагүй. Бидний тэмцэл та нар шиг юмнуудтай тэмцэхэд зарцуулагдсаар байгаад арваад жил болж байна.

Чи "Хотгор Шанага"-ын уурхайг зарсан чинь худлаа юу? Ах дүү, зөвлөхийн чинь дансаар хэдэн сая ам.доллар орж ирсэн чинь үнэн шүү дээ гэв. 

---