Ерөнхийлөгч асан Х.Баттулга "Хөрөнгө оруулалтын хууль нэрээр Монгол Улсын газар нутгийг 100 жилээр гадаадынханд өгөх гэж байгаа Ч.Хүрэлбаатар нарын санаачилсан хуулийн төслийг эсэргүүцэж байна" хэмээн УИХ-ын дарга Г. Занданшатарт өөрийн биеэр шаардлага гардуулан өгсөн. Түүний шаардлагын эсрэг Эдийн засаг, хөгжлийн сайд Ч.Хүрэлбаатар мэдээлэл хийв.

Эдийн засаг, хөгжлийн сайд Ч.Хүрэлбаатар: 

-Надтай холбоотой мэдээлэл, гүтгэлэг сүүлийн өдрүүдэд ихээхэн гарч байна. Энэ бүхнийг зохион байгуулсан эзэн нь өнөөдөр ил гарч ирлээ. Тэрээр миний санаачилсан долоо хуулийн төсөлд хориг тавьж байсан. Харин одоо найм дахь хоригоо тавьж байх шиг байна.

Монгол Улсын эдийн засгийн хамгийн гол хөдөлгүүр нь хөрөнгө оруулалт. Улс их хөрөнгө оруулалт авч байж хөгжинө. Хөгжихийн хэрээр иргэдийн орлого нэмэгдэнэ. Гадаадын хөрөнгө оруулалтын хуулийн нэлээд хэлэлцүүлсний дараа оруулж ирсэн. Гадны банк оруулж ирэх хэрэгтэй. Ингэснээр зээлийн хүү буурч иргэдэд үүний үр өгөөжийг хүртэнэ гэж бодож байна. Мөн гадны эмнэлэг, сургууль байгуулагдаасай. Түүнчлэн боловсруулах үйлдвэр, баяжуулах үйлдвэрүүд олноор баригдаасай гэж хүсэж байна. Ингэж байж өндөр цалинтай иргэд бий болно. Гадаадад олон сая ажиллаж амьдарч байгаа иргэд эх нутагтаа сайхан амьдрах боломж нь бүрдэж эхэлнэ.Төрийн хөрөнгө оруулалт бус хувийн хэвшлийн хөрөнгө оруулалтыг дэмжих ёстой юм.

Ардчилсан намынхан өнөөдөр ийм асуудал ярьж байгаад үнэхээр харамсаж байна. Монгол Улсыг хааж боосноор хөгжихгүй гэдгийг бүгд харж байна. 

Сүүлийн хэдэн өдрөөр яригдаад байгаа тус хуулийн төслийн талаар та бүхэнд мэдээлэл өгье.

Эхний асуудал Ч.Хүрэлбаатар гадаадуудад газрыг 100 жилээр өгөх гэж байна гэдэг гүтгэлэг тарааж байна. 1993 оны хуулиар 60 жилээр газрыг ашиглуулна түүнийг нэг удаа 40 жилээр сунгаж болно гэдгийг хуульчилж өгсөн. 100 жилээр газар ашиглуулж болно гэдэг хуулийг Н.Багабандийг УИХ-ын дарга байхад баталж байсан. Дараа нь 2013 онд Ц.Элбэгдоржийн үед энэ хуульд өөрчлөлт орж "газрыг хөрөнгө оруулагч нарт 60 жилээр ашиглуулж, эзэмшүүлж болно" гэж өөрчилсөн. Өөрөөр хэлбэл, эзэмшүүлэх гэдэг үг нэмсэн. Энэ бүгдийн захиалагч нь Х.Баттулга. Тухайн үед Засгийн газрын сайд байсан. Өнөөдөр залруулах гэж байхад гүтгэх ажиллагааг зохион байгуулж байна. 

2023 онд бидний оруулж ирсэн хуульд газрыг эзэмшүүлэх гэдэг үгийг хасаад ашиглуулах болгох гэж байгаа гэдгийг ойлгох хэрэгтэй. 

Дараагийн асуудал нь, гадны хүмүүсийг чөлөөтэй оруулж ирэх асуудлыг нээж өгч байна гэжээ. Гадаадын иргэний эрхзүйн байдлын тухай хуулиар виз олголтыг зохион байгуулдаг. Энэ асуудлыг шийдвэрлэдэг тусгай агентлаг байдаг. Гэтэл Хөрөнгө оруулалтын хуулиар виз олгохгүй шүү дээ. Хаа хамаагүй хуультай нааж яриад байна. Монгол Улсын хуулийг хэтэрхий үгүйсгэж, доромжилж иргэдэд буруу мэдээлэл өгч байна гэв

---