УИХ-ын чуулганы хуралдаан болж байна. Чуулганы хуралдааны эхэнд УИХ-ын гишүүн Ш.Адьшаа ХЗДХ-ийн сайд Б.Энхбаярыг мөрдөн байцаалт, гүйцэтгэх ажиллагааны нууц задруулсан гэж хэлэв. 

УИХ-ын гишүүн Ш.Адьшаа:

-Эрүүгийн хэрэг хянан шийдвэрлэх, шүүхийн тухай хуулийг Засгийн газраас нэн яаралтайгаар хэлэлцэхээр шийдвэрлэсэнд баяртай байна. Авлигатай тэмцэх хууль эрхзүйн орчинг бүрдүүлнэ гэдэг халхавчийн дор авлигын шүүх байгуулна, мөрдөн шалгах ажиллагааны нууц задруулахад хүн гэдэг ойлголтыг оруулж ирж шударга иргэд, сэтгүүлчдийг баривчлах гэж байгаад олон нийтийн эсэргүүцэлтэй тулгарч замхарсан.

Шүүх хуулийн өмнө бид сайд УИХ-ын гишүүд тэгш эрхтэй байх ёстой. Мөрдөн шалгах ажиллагааны нууцыг сайд нь өөрөө задруулаад байна. 20 тэрбум төгрөгийн хөрөнгөтэй сэтгүүлч байна гэж ХЗДХ-ийн сайд Б.Энхбаяр өөрөө задруулсан. Энэ нь мөрдөн байцаалт, гүйцэтгэх ажиллагааны нууц. Үүнийг ямар эх сурвалжаас авч мэдээлснээ ард түмэнд нээлттэй зарлахыг сайдаас шаардаж байна. Б.Энхбаяр сайд ерөнхий сайдын шударга ёсны илд байна гэж хэлж гарч ирсэн. Гэтэл одоо шударга ёсыг нухчин дардаг, том гэмт хэргийг нуун дарагдуулдаг “буг чөтгөр” боллоо гэж бодож байна гэв. 

---