Ерөнхийлөгчийн нэр хүндэд халдсан хэмээн гурван иргэнийг тус бүр 100 мянган төгрөгөөр торгосон талаар Цагдаагийн байгууллагаас мэдээлэв.

ЦЕГ-ын Гэмт хэрэг, зөрчлөөс урьдчилан сэргийлэх хэлтсийн дарга, цагдаагийн дэд хурандаа О.Одонбаатар:

-Гэмт хэрэг зөрчлөөс урьдчилан сэргийлэх тухай хуулийн 31 дүгээр зүйлд "иргэн бусдын алдар хүнд, эрх, хууль ёсны ашиг сонирхлыг хохироохгүй байх, өөрийн үзэл бодлоо илэрхийлэхдээ бусдын нэр төрд хүндэтгэлтэй хандах, гэмт хэрэг зөрчилд бусдыг өдөөн хатгахгүй байх" үүрэгтэй байдаг. Иргэн дээрх үүргээ зөрчсөн тохиолдолд зөрчлийн тухай хуулийн 5.9-р зүйлд заасны дагуу 100 нэгжтэй тэнцэх хэмжээний төгрөгөөр торгох зохицуулалттай байдаг.

Уг хуулийн дагуу Цагдаагийн байгууллагаас Ерөнхийлөгч мэндчилгээ дэвшүүлэх үед доромжилсон агуулга бүхий бичлэг зураг нийтэлсэн нийт гурван иргэнийг шалгаж, хариуцлага тооцсон.

Монгол Улсын Үндсэн хууль, Монгол Улсын Ерөнхийлөгчийн тухай хуулийн 16 дугаар зүйлд зааснаар Монгол Улсын Ерөнхийлөгч бол Төрийн тэргүүн, Монголын ард түмний эв нэгдлийг илэрхийлэгч буюу хэн байхаас үл хамааран төрт ёс, тусгаар улсын бэлгэдэл, халдашгүй дархан эрхтэй юм гэлээ.

---