Одоогоос гурван сарын өмнө хуралдсан Засгийн газрын хуралдаанаар Монгол Улсын баг, тамирчид Парис-2024 олимпод цагаан туган дор оролцох эрсдэл үүссэн тухай асуудлыг хэлэлцэж, ЗГХЭГ-ын дарга Д.Амарбаясгалангаар ахлуулсан ажлын хэсгийг байгуулж байсан билээ.

Улмаар ЗГХЭГ-ын дарга, МАН-ын ЕНБД Д.Амарбаясгалан БНХАУ-ын Шанхай хотод есдүгээр сарын 22-нд хуралдсан Дэлхийн Допингийн эсрэг байгууллага /WADA/-ын хуралд оролцож, тус байгууллагын дүрмийг дөрвөн сарын дотор бүрэн биелүүлэх амлалт өгснөөр “ажиглалтын жагсаалт”-д оруулсан байсан юм.

Тэгвэл Засгийн газраас гарсан ажлын хэсэг тулгарч байсан асуудлуудыг шуурхай шийдвэрлэж ажилласны үр дүнд шаардлагуудыг 3 сарын хугацаанд бүрэн биелүүлжээ. Өөрөөр хэлбэл, Монгол Улсын баг тамирчид Парисын олимпод Монгол Улсынхаа далбаан дор оролцохоор болж байна. 

---