Ерөнхий боловсролын 1-5 дугаар ангийн сурагчдын хичээлийг өвлийн амралт эхэлтэл цахим хэлбэрээр оруулах шийдвэрийг ням гарагт гаргасан билээ. 

Өөрөөр хэлбэл, дээрх шийдвэрийг маргаашнаас нь хэрэгжүүлж эхлээд байна. Энэхүү гэнэтийн шийдвэртэй холбоотойгоор УИХ-ын Боловсрол, соёл шинжлэх ухааны байнгын хорооны даргаар ажиллаж байсан Г.Дамдинням гишүүн шүүмжлэлтэй хандсан байна.

УИХ-ын гишүүн Г.Дамдинням:

-Боловсрол шинжлэх ухааны яамны энэ гэнэтийн шийдвэрээс болж иргэд хохирч байна. Аав, ээжүүд нь ажил, амьдралаа зохицуулж таарна. Гэтэл яасан гэхээр "хүйтэн боллоо" гээд цахимаар хичээллэх болчихлоо. Ямар ч амьдралгүй шийдвэр гаргаж байна.

Эрүүл мэндийн яамнаас өгч буй мэдээллээр ханиад, томуугаар өвчилсөн хүүхдүүдийн 91 хувь нь 0-15 насныхан байна гэж байгаа. Хамгийн их ханиад томуу хүрч байгаа хэсэг болох цэцэрлэгийн хүүхдүүдийг цэцэрлэгт явуулахыг болиулаагүй байгаа байхгүй юу. Онцгой байдлын комисс дээрээ энэ асуудлыг ярих хэрэгтэй гэв.

---