“Эрдэнэс таван толгой” ХК-ийн нүүрс баяжуулах үйлдвэрийн барилгын зураг төсөв боловсруулах, барилга угсралтын ажлын тендер шалгаруулалт, гэрээний асуудлыг хэлэлцэж байна.

Мөн төслийн санхүүжилттэй холбоотой ил болгосон нүүрсээр санхүүжүүлэх нөхцөлтэй оффтэйк гэрээний талаар шинжээчийн дүгнэлтийг танилцуулав.

Гэрчээр "Эрдэнэ таван толгой" ХК-ийн ТУЗ-ийн дарга Д.Батбаатар, Хууль эрхзүйн хэлтсийн дарга М.Батбаяр, ТУЗ-ийн гишүүн Г.Нандинжаргал, ТУЗ-ийн гишүүн Т.Ганттулга, ТУЗ-ийн хараат бус гишүүн Ү.Амарбат, ТУЗ-ийн хараат бус гишүүн Х.Болор-Эрдэнэ нарыг дууджээ. Харин ТУЗ-ийн хараат бус гишүүн байсан П.Өлзийнаран ганцаар сонсголд оролцов.

ТУЗ-ийн хараат бус гишүүн асан П.Өлзийнаран:

-ТУЗ-д хамт сууж байсан том дарга нар ирээгүйд харамсаж байна. Анх компанийн ТУЗ-д мэргэжлийн хүний хувьд ороод маш их эмзэглэж байсан. Энэ том төслийг ямар ч судалгаа, шинжилгээгүй, сэтгэлгүйгээр ухаж ирсэн байсан. Тухайлбал, нүүрс баяжуулах үйлдвэр ашиглалтад орсноор ажлын байр нэмэгдэнэ, бүтээгдэхүүний чанар дээшилнэ, үнэ өсөх магадлалтай гэх мэтчилэн төслийн тогтвортой хөгжлийг хангах ач холбогдолтой гэдгийг хэлж судалгаа шинжилгээний ажил хийх шаардлага тавьж ирсэн.

Харамсалтай нь, саналын эрхтэй хувьцаа эзэмшигчид маань энэ төслийн тогтвортой байдлыг хангах хөрөнгө оруулалт огт хийгээгүй. Боловсруулах үйлдвэр барих сонирхолгүй. Би энэ чигээр нь байлгаж байгаад хувьчилж авах сонирхолтой бүлэг энэ бүхнийг хийлгэхгүй байна даа гэж хардаг байсан.

Анх орсноосоо эхлээд л суурь судалгаагаа эхлүүлээч ээ, ахуйгаар ярих юм бол саалийн сүүтэй үнээгээ малын эмчид үзүүлж, вакцинд хамруулаач ээ гэдэг саналыг байнга тавьдаг байсан. Нүүрс баяжуулах үйлдвэрийн гэрээ нэмэлт өөрчлөлтүүдийг намайг ТУЗ-өөс гарсны дараа хийсэн байна. 

Иймэрхүү байдлаас болоод би ТУЗ-өөс гарах саналаа өгсөн. Дарга, цэрэг нарын хүүхэд, найзууд туслахууд нь ТУЗ-ийн хуралд мэргэжлийн бус, төслөө ойлгоогүй, уурхай руугаа явж үзээгүй. Уурхайн тоос идэж үзээгүй хүн яаж уурхайн хөгжил цэцэглэлтийг бүтээж, төсөөлөх юм, яаж энэ технологийн нарийн хөрөнгө оруулалтуудыг хийлгэхийг шаардах юм? Ер нь шаарддаггүй байсан учраас "Эрдэнэс Тавантолгой"-н шаардлагатай хөрөнгө оруулалтууд хийгдээгүй. Суурь судалгааны ажлуудыг шахаж байж арай гэж хийлгэж байсан.

Мөн оффтейк гэрээг намайг ТУЗ-өөс гаргаж байгаад хийсэн. Би ТУЗ-ийн хурал болгон дээр нууцад байгаа гэрээнүүдээ ил болгооч гэж хэлдэг байсан. Инженер хүний хувьд шаардах юмаа шаардаж, мэдээлэлтэй танилцах ёстой байдаг. Энд танилцуулж байгаа гэрээнүүдийг намайг нууцаас гаргаж байгаад хийсэн.

Хүндрэлтэй үе ТУЗ-ийн хараат бус гишүүдэд байдаг. Бүх цаг үеийн ТУЗ-ийн хараат бус гишүүдийг авч ирж, асуугаасай гэж хүсэж байна. 2016 оноос өмнөх ТУЗ-ийн материалыг устгачихсан шүү. 2016 оноос өмнө Ардчилсан намынхан ТУЗ-д байсан. Хэн, хэн устгасныг мэдэхгүй байна. Компанийн өмнөх материалуудтай танилцах гэхэд байхгүй, олдоогүй, надад "устгачихсан" гэж хэлсэн. Шинжээчид үүнийг олж хараасай гэж хүсэж байна гэв. 

---