Хянан шалгах түр хорооны нотлох баримтыг шинжлэн судлах нээлттэй сонсголын хоёр дахь үе шат өнөөдөр болж өнгөрлөө. Энэхүү сонсгол дээр УИХ-ын гишүүн Ш.Адьшаатай холбоотой асуудлыг Түр хорооны дарга Б.Энхбаяр хөндлөө.  

Тэрбээр, "Таны үүсгэн байгуулсан компани дээр н.Жаргалсайхан гэж холбогдоод байгаа хүн чинь өмнөх сонсгол дээр жижиг Тавантолгой ХК-ийн ТУЗ-ийн гишүүн гэж гарсан. Энэ хүнтэй холбоотой нүүрс тээврийн компанитай юм байна. Нүүрс, ачиж буулгах талбайтай юм байна. 

Таны зөвлөхөөр ажиллаж байсан Ш.Мөнхцэцэг гэдэг хүний "Эм Жи Өү" ХХК 680 тээврийн хэрэгслээр 52 мянган тонн нүүрс, "Энх дэлгэр говь" ХХК 268 тээврийн хэргэслээр 21,1 мянган тонн нүүрс, "Зүүн Хөхий" ХХК найман удаа 759 тонн нүүрс, "Мөнх цаст транс" ХХК 442 тээврийн хэрэгслээр 34320 тонн нүүрсийг тус тус гаалийн бүрдүүлэлтгүйгээр гаргасан байна. Тэгэхээр тэр зөвлөхөө нүүрсний жагсаал болоод тав дахь хоног дээр нь чөлөөлсөн байна. Юунд нь сандраад та чөлөөлчихөв?" гэсэн. 

Энэ талаар УИХ-ын гишүүн Ш.Адьшаа тайлбар хийсэн юм. Тайлбарыг та бүхэнд дэлгэрэнгүй хүргэе 

УИХ-ын гишүүн Ш.Адьшаа:

-Би энэ сонсголд ард түмнээ хүндлээд, төрөө хүндлээд ирсэн. Ийм гүжир гүтгэлэг Монголын түүхэнд дахиад байх юм уу, үгүй юмуу мэдэхгүй байна.

Миний бие 2005 онд Монголын гаалиас чөлөөлөгдсөн. 2020 онд Монгол Улсын их хурлын гишүүнээр сонгогдсон. 2012 оноос хойш миний бие, миний ах дүү, хамаарал бүхий хүмүүс нүүрс худалдан авалт болон хөрс хуулалтын бизнес хийсэн бол би хуулийн хариуцлага үүрэхэд бэлэн байна. Ард түмэндээ, Ховд аймгийн олон мянган төлөөллийн хувьд хариуцлагатайгаар хэлж байна.

Энэ нүүрсний сонсгол чинь ер нь зорилгоосоо хазайлаа. Гөлөг төөрүүлэх, жинхэнэ нүүрсний хулгайчдыг нуух зорилготой ийм үйл ажиллагаа явуулж байгаа юм биш биз дээ, түр хорооны гишүүд ээ. Миний бие 2022 оны зургаадугаар сард УИХ-ын 26 гишүүнээр гарын үсэг зуруулан дэмжүүлж төр хувийн хэвшлийн компаниудын нүүрс тээвэрлэлтийн борлуулалт, хил гаалийн үйл ажиллагаанд хяналт тавих Түр хороог байгуулсан. Үүний үргэлжлэл өнөөдөр явж байгаа шүү гэв. 

---