Хөдөө орон нутагт үүссэн түлшний хомстол өнгөрөгч долоо хоногоос Улаанбаатар хотыг дайрч, өнгөрөгч амралтын өдрүүдэд нийслэл хотод шатахууны урт дараалал үүслээ. Засгийн газар, тэр дундаа УУХҮЯ, АМГТГ-ын удирдлагууд "Удахгүй хэвийн болно" хэмээн ярьж байгаа ч ингэж хэлсээр хоёр сар өнгөрсөн тулд иргэд итгэх больжээ.

Гэтэл иргэд амралтын өдөр олон цагаар шатахуунд дугаарлаж, даарч хөрч, амарч ч чадахгүй зогсох үед энэ асуудлыг хариуцдаг АМГТГ-ын дарга Л.Баярмандал "Шангри-Ла" зочид буудалд итали дуу сонссон шигээ баярлаж, цэнгээд явж байсныг УИХ дахь АН-ын бүлгийн гишүүд хүчтэй шүүмжлэв. 

УИХ дахь АН-ын бүлгийнхэн УУХҮ-ийн сайд Ж.Ганбаатар болон АМГТГ-ын дарга Л.Баярмандал нарыг дуудан ирүүлж түлш, шатахууны хомстлын талаар мэдээлэл сонссон байна. Энэ үеэр АМГТГ-ын дарга Л.Баярмандалын ёс зүйтэй холбоотой асуудал хөндөгджээ. 

Өнгөрөгч амралтын өдрөөр Итали улсын нэртэй хамтлаг, дуучид Монголд хүрэлцэн ирж, цомхон /300 хүн/ хүрээнд тоглолт зохион байгуулжээ. Тоглолтын таксын талаар янз бүрээр мэдээлж байгаа боловч, 1000-2000 ам.доллар байсан болов уу гэсэн таамаг илүүтэй байна. Энэхүү арга хэмжээнд АМГТГ-ын дарга Л.Баярмандал явж байсан нь АН-аас сонгогдсон УИХ-ын гишүүдийн хүчтэй шүүмжлэлд өртөв. 

УИХ-ын гишүүн Н.Ганибал: 

-Иргэд олон цагаар шатахуунд дугаарлаж явахад энэ асуудлыг шийдвэрлэх ёстой АМГТГ-ын дарга нь бүжиглээд, баярлаж цэнгээд явж байсан байх юм. Энэ бол монгол төрийн аливаа асуудалд хандаж байгаа дүр төрх. Хувь тавилангийн шоглоом. Иймд бид Монгол Улсын Ерөнхий сайдад хандан УУХҮ-ийн сайд Ж.Ганбаатарт хариуцлага тооцохыг шаардаж байгаа гэв. 

---