Улсын баяр наадамд ес даван түрүүлсэн улсын арслан М.Бадарчийн В сорьцын шинжилгээний хариу ирснээр сэргээшийн төрлийн бодис хэрэглэсэн болох нь бүрэн баталгаажсан. Улмаар Үндэсний бөхийн салбарын хороо 2023 оны есдүгээр сарын 26-нд хуралдаж, барилдах эрхийг дөрвөн жилээр хасах санал гаргаж, саналаа Монгол Улсын ерөнхийлөгчид уламжилсан билээ. 

Харин улсын харцага М.Бадарч Үндэсний бөхийн салбарын хорооны тогтоолыг хүчингүй болгуулахаар Монголын олон улсын ба үндэсний спортын Арбитрын дэргэдэх допингийн давж заалдах комисст ханджээ. Тус комисс ойрын өдрүүдэд хуралдаж, Үндэсний бөхийн салбарын хорооны тогтоолыг хүчингүй болгож магадгүй байна гэж эх сурвалж мэдээллээ. Өөрөөр хэлбэл, улсын харцага М.Бадарчийн барилдах эрхийг сэргээж магадгүй гэжээ. 

Учир нь улсын харцага М.Бадарч допинг хэрэглэсэн, хэрэглээгүй гэдэг дээр гомдол гаргаагүй, харин шинжилгээ авахдаа хууль хүчний байгууллагаас байлцсан нь олон улсын хууль зөрчсөн гэдгээр маргаан үүсгэсэн юм байна. 

Мөн, Монголын олон улсын ба үндэсний спортын Арбитрын дэргэдэх допингийн давж заалдах комиссоос хоёр хоногийн өмнө Монгол Улсын харцага Ц.Мөнхбаяр, аймгийн арслан Б.Өсөхбаяр нарын барилдах эрхийг сэргээжээ. Монголын Үндэсний Бөхийн Холбооны тэргүүлэгчид 2023 оны 06 дугаар сарын 27-ны өдрийн №69 дугаар тогтоолоороо тус хоёр бөхийг допинг хэрэглэсэн болохыг баталгаажуулж, барилдах эрхийг нь дөрөв, дөрвөн жилээр хассан юм. Уг хоёр бөх шинжилгээг авахдаа олон улсын дүрэм, журмаар аваагүй гэдэг маргааныг үүсгэснийг Монголын олон улсын ба үндэсний спортын Арбитрын дэргэдэх допингийн давж заалдах комисс хүлээн авч, тэдний гомдлыг хангаж шийдвэрлэсэн юм. 

---