Хянан шалгах түр хорооны дарга, Хууль зүй, дотоод хэргийн сайд Б.Энхбаяр мягмар гаргийн /2023.12.05/ нээлттэй сонсголын үеэр Хянан шалгах түр хорооны гишүүн С.Ганбаатарын эхнэрийн хөрс хуулалтын компанийн талаар олон нийтэд мэдээлэв. С.Ганбаатарын эхнэр Б.Тунгалаг бусадтай хамтран байгуулсан "Болор Аграмба" ХХК нь 4.5 сая метр.куб хөрс хуулалтын ажил гүйцэтгэсний хөлс гэж 22.8 тэрбум төгрөгийг авчээ. Б.Энхбаярын сайдын дэлгэсэн энэхүү мэдээллийг С.Ганбаатар няцааж, дараах мэдээллийг хийв.

УИХ, Хянан шалгах түр хорооны гишүүн С.Ганбаатар:

-Б.Энхбаяр сайдын хэлснээр би 22 тэрбум төгрөгийн эзэн боллоо. Өчигдрийн УИХ-ын чуулганы нэгдсэн хуралдаанаар Ч.Хүрэлбаатар сайд хөрс хуулалтын тухай ярьсан. 22.8 тэрбум төгрөгийн хөрс хуулалтын үйл ажиллагаа нь үнэн юм байна. Гэхдээ миний нэрийг ашиглаад хаа нэг газар мөнгө явж байгаа юм байна. Үүнийгээ хөдөлшгүй нотлох баримтаар нотолсон гэдэгт нь итгэлээ.

Дараагийн нүүрсний сонсгол дуусах хугацаанд Б.Энхбаяр, Ч.Хүрэлбаатар сайд нар баримт нотолгоотой ар иргэдэд дэлгэрэнгүй мэдээлэл өгөх хэрэгтэй. Надад энэ мөнгөө явуулсан байж болно. Гэвч ямар дансанд хийснийг нь мэдэхгүй байна. Би нэг ч төгрөг аваагүй. Авсан бол УИХ-ын гишүүний ажлаа өгөх болно. Нүүрсний хулгайн 22 тэрбум төгрөг надаас гарч ирэх юм бол би МАН-д хандивлая. Би нэг ч хүрз барьж олоогүй мөнгийг олж өгсөн МАН-д баярлалаа гээд өгнө гэв. 

---