Өмнөговь аймагт гадаадын иргэдэд газар олгосон асуудлаар АТГ-аас мэдээлэл өгөв. 

Энэ талаар АТГ-ын Хэвлэл мэдээлэл, олон нийттэй харилцах ажилтан, комиссар Н.Тэмүүлэн: 

-Газар эзэмшүүлэх, олгохтой холбоотой асуудлаар АТГ-аас Өмнөговь аймгийн Ханбогд сумын Засаг даргаар ажиллаж байсан Э, аймгийн ИТХ-ын даргаар ажиллаж байсан Б нарт холбогдох хэргийн мөрдөн шалгах ажиллагааг дуусгаад байна. Одоогоор прокурорын хяналтын шатанд явж байна.

Ш.Э нь Өмнөговь аймгийн Ханбогд сумын Засаг даргаар ажиллаж байх үедээ албан тушаалын байдлаа урвуулан ашиглаж Газрын тухай хууль тогтоомж зөрчиж, Монгол Улсын газрын тухай хуульд аймгийн Засаг дарга газар эзэмшүүлэхдээ дуудлага худалдаа төсөл шалгаруулах журмаар шийдвэрлэнэ гэх хуулийн заалтыг зөрчиж, өөртөө болон бусдад давуу байдал бий болгож, газар олгожээ. 

Одоогийн байдлаар яллах дүгнэлт үйлдэхээр прокурорын хяналтад байгаа хэргүүдийн мэдээлэл: 

Өмнөговь аймгийн Ханбогд сумын Засаг даргаар ажиллаж байсан Ш.Э гэгч

• 2020 оны 08 дугаар сарын 07-ны өдрийн А/225 дугаартай захирамжаар  “Фүжи бит” /РД:6175724/ ХХК-д Өмнөговь аймгийн Ханбогд сумын Хайрхан 5 дугаар багийн нутаг дэвсгэрт байрлах Цагаан хад нэртэй газарт 13.6 га газар эзэмшүүлэх,
• “Ийзи транспорт” /РД:6175724/ ХХК-д Өмнөговь аймгийн Ханбогд сумын Хайрхан 5 дугаар багийн нутаг дэвсгэрт байрлах Цагаан хад нэртэй газарт 14.5 га газрыг эзэмшүүлэх,
•  2020 оны 09 дүгээр сарын 29-ний өдрийн А/249 дугаартай “Силвер титан интэрнэйшнл” /РД:6416128/ ХХК-д Өмнөговь аймгийн Ханбогд сумын Хайрхан 5 дугаар багийн нутаг дэвсгэрт байрлах Цагаан хад нэртэй газарт 13 га газар эзэмшүүлэх
• 2020 оны 11 дүгээр сарын 05-ны өдөр А/295 дугаартай "Бат Орших баян /РД:6372023/ ХХК-д Өмнөговь аймгийн Ханбогд сумын Хайрхан 5 дугаар багийн нутаг дэвсгэрт байрлах Цагаан хад нэртэй газарт 18 га газрыг эзэмшүүлэх эрх олгосон байна.

Ханбогд сумын засаг дарга Х.Н нь

• 2020 оны 12 дугаар сарын 31-ний өдрийн А/364 дугаартай захирамжаар “Сан Арвитай” ХХК-д 20 га газрыг 15 жилийн хугацаатай гаалийн хяналтын талбайн зориулалтаар эзэмшүүлэх
• 2021 оны 09 дүгээр сарын 17-ны өдөр А/295 дугаартай захирамжаар “Лилия гарден” /РД:6416128/ ХХК-д Өмнөговь аймгийн Ханбогд сумын Номгон 1 дүгээр багийн нутаг дэвсгэрт байрлах Цагаан хад нэртэй газарт 10 га газрыг эзэмшүүлэх,
• 2021 оны 02 дугаар сарын 03-ны өдөр А/30 дугаартай “Соронзон говь” /РД: 3624846/ ХХК-д Өмнөговь аймгийн Ханбогд сумын Хайрхан 5 дугаар багийн нутаг дэвсгэрт байрлах Цагаан хад нэртэй газарт 20 га газрыг эзэмшүүлэх
• Өмнөговь аймгийн Ханбогд сумын Засаг даргын 2021 оны 10 дугаар сарын 06-ны өдрийн А/315 тоот захирамжаар “Аз хур трэйвэл” ХХК-д гаалийн хяналтын талбайн зориулалтаар 10 га газрыг 15 жилийн хугацаатай Ханбогд сум, Номгон баг, Цагаан хаданд газар эзэмшүүлсэн байна.

Уг хууль бусаар газар олгосон хэрэгт нийт 11 хүн яллагдагчаар татагджээ. 

Нүүрсний сонсголоор Өмнөговь аймгийн Ханбогд сумын газар нутгийг гадаадын иргэнд хууль бусаар олгосон хэмээн зарлахаас өмнө дээрх хэргүүдэд АТГ-аас мөрдөн шалгах ажиллагааг явуулж, 2023 оны есдүгээр сарын 23-ны өдөр яллах дүгнэлт үйлдүүлж шүүхэд шилжүүлэх саналтайгаар прокурорын байгууллагад хүргүүлсэн байна.

Монгол Улсын Ерөнхийлөгч хууль бусаар газар олгосон асуудлыг түргэн шуурхай шалгах чиглэл өгсний дагуу АТГ-аас хэрэг бүртгэлтийн хэрэг нээж, мөрдөн шалгах ажиллагааг явуулж байна.

---