Сүүлийн үед Шатахуун түгээх станц /ШТС/-уудын зарим нь АИ-92 шатахуун олгохгүй байгаа билээ.

Гэвч Уул уурхай, хүнд үйлдвэрийн яамны удирдлага болон холбогдох албаныхан шатахуун хомстоогүй, нөөц хэвийн байгаа гэдэг тайлбарыг өгч эхэлсэн. ОХУ-аас авах шатахууны хэвийн байдлыг хангаж, улмаар БНХАУ-аас шатахуун нэмж импортоор авахаар тохирсон гэдэг мэдээллийг өгч байгаа ч зарим ШТС АИ-92 шатахуун худалдахгүй байгаа юм байна.

Тухайлбал, өнөөдөр Гандангийн хойно байрлах “Магнай трейд” компанийн ШТС-д очиход, АИ-92 бензинийг зөвхөн талон болон МТ шатахууны картаар олгож байлаа. Энэ талаар ШТС-ийн түгээгчийн ажилтнаас тодруулахад “Манайх зөвхөн талон болон МТ шатахууны карттай жолоочид бензин олгож байна. Манай компани дээр очиж, талон авах боломжтой” гэлээ.

Тус ШТС бэлэн мөнгө болон банкны картаар төлбөр тооцоо хийхгүй гэж байв. Ийнхүү зарим ШТС ч АИ-92 өгөхгүй байгаа ажээ. 

---