"Шүүх эрх мэдлийг хэрэгжүүлж буй шүүгч нарт иргэний хяналт тавьцгаая" сэдвээр иргэд мэдээлэл хийж байна.

Иргэн Б.Батдэлгэр:

-Шүүхийн сахилгын хороо иргэдийн өргөдөл гомдлыг хуулийн хүрээнд шийдвэрлэж чадаж байна уу? Хууль бус ажилласан шүүгчдийг огцруулж чадаж байна уу? Шүүхийн сахилгын хэрэг үнэн зөвөөр шийдэгдэж байна уу гэдэг асуудлаар өнөөдрийн хэвлэлийн хурлыг зарласан. Шүүх эрх мэдэлд иргэдийн тавих хяналтгүй болжээ. Шударга шүүхээр шүүлгэх эрхгүй болсон байна.

Иргэд шүүгчийн талаар гомдол гаргадаг үүнээс өөр байдлаар бусад үйл ажиллагаанд оролцох боломжгүй. Сахилгын хорооны шийдвэрт гомдол гаргах эрхгүй. Хариуцлага алдсан шүүгчид шударга хяналт тавьж чадахгүй байна.

Шүүгчид мөнгө, эрх мэдэл, танил талдаа үйлчилж, тэдний эрх мэдлийг хамгаалж байна. 

2022 онд иргэд ШЕЗ-д 462 өргөдөл өгснөөс 201 сахилгын хэрэг үүсгэсэн байна. Үүнээс 40 шүүгчид сахилгын арга хэмжээ авсан. Хаалттай сануулга 3, нээлттэй сануулга 14, цалинг бууруулах арга хэмжээ авсан байна. Таван шүүгчийг огцруулах шийдвэр гаргасан байгаа. Гэхдээ эдгээр таван шүүгчийн асуудлыг Дээд шүүхээр хэлэлцсэн эсэх нь тодорхойгүй хэвээр байна. 

Миний зүгээс D parlament цахим хуудаст дээр Шүүхийн тухай хуулийн 101.5 дахь заалт дээр ШЕЗ-ийн сахилгын хороонд өргөдөл гомдол гаргагчийг хэргийн оролцогчоор хуульчилж өгье гэдэг дээр санал асуулга гаргасан. Иргэд та бүхэн шударга шүүхээр шүүлгэх эрхийнхээ төлөө, шүүгчид тавих иргэдийн хяналтыг сайжруулахад саналаа өгөхийг уриалж байна. 

Иргэн Ц.Нарангэрэл:

-Иргэд нэгдээд Шүүхийн тухай хуулийн шүүсийг шахах ёстой. Нийтийн эрх ашгийн төлөө шүгэл үлээгчийг төр хамгаалах ёстой юм. Үндсэн хуульд шударга шүүхээр шүүлгэнэ гээд заачихсан байгаа. Иргэд хуулийн өмнө тэгш эрхтэй байх ёстой. Талуудын тэгш боломжийн асуудлыг хангах хэрэгтэй байна. Жилд 55-60 мянган хэрэг шийдэгддэг. Харин иргэдийн 70 гаруй хувь нь шүүхэд итгэдэггүй гэж судалгаанд хамрагдсан байгаа. Шүүхийн байгууллага бие даасан, хараат бусаар шийдвэр гаргадаг байх ёстой. Харин төрийн эрх мэдлийг ашиглаад, авлига аваад албан тушаалтнуудад үйлчилдэг энэ тогтолцоог л өөрчлөх хэрэгтэй гэв. 

---