Motive хамтлаг 15 жилийн ойдоо зориулсан “The night” тоглолтоо 11-р сарын 18-нд хийх гэж байна. Тоглолтын зохион байгуулалттай холбоотой хэвлэлийн хурал өнөөдөр болов.

Motive хамтлаг 15 жилийн хугацаанд жижиг хэмжээний дөрвөн тоглолт, бие даасан бүрэн хэмжээний хоёр тоглолт зохион байгуулжээ. Мөн орон даяар хоёр аялан тоглолтыг зохион байгуулж байжээ. “The night” тоглолт нь тус хамтлагийн гурав дахь бие даасан, бүрэн хэмжээний тоглолт болох юм. Хуучны хит дуунуудаа шинэчилсэн найруулгаар хүргэхээр бэлтгэжээ.

Тоглолт гурван хэсгээс бүрдэх юм байна. Хамтлагийн гишүүд бүжиглэж сонсогч олондоо бэлэг барихаар бэлджээ. Олон сайхан уран бүтээлчид тус хамтлагийн ойн тоглолтод оролцоно гэдгээ илэрхийлжээ. 

Тасалбарын борлуулалт одоогоор 87 хувьтай байна гэж зохион байгуулагчдын зүгээс мэдэгдлээ. 

Гадаадын болон орон нутгийн фенүүддээ зориулж цахимаар үзүүлэх эсэхээ шийднэ гэж хамтлагийн уран бүтээлчид хэлэв. Мөн 2024 ондоо 21 аймгаар бүрэн хэмжээний тоглолтоо үзэгч түмэндээ өргөн барихаар төлөвлөжээ. 

Хэвлэлийн хурлын үеэр Motive хамтлагийн 15 жилийн ойн тоглолтыг зохион байгуулагчдын зүгээс болон хамтлагийн зүгээс "Тоглолтынхоо орлогоос 10 сая төгрөгийг МУУГЗ С.Баатарсүхийн эмчилгээнд хандивлана" гэдгээ мэдэгдлээ.

---