"Гэр хорооллын өрхөд цахилгаан эрчим хүчний тарифын хөнгөлөлт үзүүлэх журам” Монгол Улсын Засгийн газрын 2017 оны 199 дүгээр тогтоолд заасны дагуу цахилгааны шөнийн тарифын хөнгөлөлт өнөөдөр буюу арваннэгдүгээр сарын 1-нээс мөрдөгдөж эхэлж байна.

Хөнгөлөлтийн хувь, хамрах хүрээ:

Нийслэлийн гэр хорооллын хэрэглэгчдийн орой, шөнийн цаг буюу 21-06 цагийн хооронд хэрэглэсэн цахилгааны тарифыг дараах байдлаар хөнгөлнө:

- 220В-ын хүчдэлийн түвшинтэй хэрэглэгчийн 700 кВт.цаг хүртэл хэрэглээг 100 хувь, түүнээс дээш хэрэглээг 50 хувь

- 380В-ын хүчдэлийн түвшинтэй хэрэглэгчийн 1500 кВт.цаг хүртэл хэрэглээг 100 хувь, түүнээс дээш хэрэглээг 50 хувь

-Аймгийн төв, 10 мянгаас дээш хүн амтай сум суурингийн гэр хорооллын хэрэглэгчдийн орой, шөнийн цаг буюу 21-06 цагийн хооронд хэрэглэсэн цахилгааны тарифыг 50 хувь хөнгөлнө.

Хөнгөлөлтөд хамрагдах нөхцөл: 

-Аюулгүй байдлаа хангаж, өөрийн ашиглаж буй халаагуур, хэрэглээнд тохирсон, стандартын шаардлага хангасан цахилгаан тоноглол суурилуулсан байх

-Баталгаажсан тарифт бүрэн электрон тоолууртай байх

-Хөнгөлөлтөд хамрагдахаас өмнө цахилгаан эрчим хүчний өр төлбөргүй байх зэрэг юм. 

Энэ өвөл цахилгааны шөнийн тарифын хөнгөлөлтөд зориулж 33 тэрбум төгрөгийг Эрчим хүчний сайдын багцад тусгажээ. 

---