УИХ-ын гишүүн асан Т.Аюурсайхан, “Эрдэнэс Тавантолгой” ХК-ийн захирал асан Б.Ганхуяг нарын 11 хүнд холбогдох шүүх хурал ирэх сарын 13-ны өдрийг хүртэл хойшлогдов.

УИХ-ын гишүүн асан Т.Аюурсайхан, “Эрдэнэс Тавантолгой” ХК-ийн захирал асан Б.Ганхуяг нарын 11 хүнд холбогдох шүүх хурал өнөөдөр товлогдсон байсан. Гэсэн ч өмгөөлөгчдийн зүгээс шинжээч болон гэрчүүд бүрэн ирээгүй тул шүүх хуралдааныг хойшлуулж өгөхийг хүссэн юм. Мөн Б.Ганхуяг цагдан хорих, таслан сэргийлэх арга хэмжээг өөрчилж өгөхийг хүссэн ч шүүхээс хүсэлтийг хүлээн авахаас татгалзжээ. Ийнхүү шүүх хуралдааныг хойшлуулж, ирэх сарын 13-ны 11:30 цагт товлов.

Шүүх хуралдааны үеэр "Эрдэнэс Тавантолгой" ХК-ийн гүйцэтгэх захирал асан Б.Ганхуяг үг хэлэв. 

"Эрдэнэс Тавантолгой" ХК-ийн гүйцэтгэх захирал асан Б.Ганхуяг:

-Есдүгээр сараас хойш миний биеийн байдал сайнгүй байгаа. Хамаг биеэр юм туурсан. Хуучин идээ гараад байсан. Гэтэл одоо идээ гарахаа больсон, хоёр хөл явахад хэцүү болсон. Хоёрдугаар шатлалын эмнэлэгт арьс, биеэр гараад байгаа зүйлүүдийг эмчлүүлэх шаардлагатай байна. Миний бие иймэрхүү зүйл яриад байдаггүй. Асуудлаас зугтаж биш зүтгэж ард нь гардаг. Би зөвхөн монголдоо байдаг хүн. Хэргээс хэзээ ч зугтахгүй. Биеийн байдлыг минь харгалзаж үзэхийг хүсэж байна. Биеэр гарсан юм цус шүүрээд байгаа учраас би дотуур өмд ч өмсөхөө больсон. Эмчлүүлмээр байна. Цагдан хориог өөрчилж өгөхийг хүсэж байна.

Би шүүх хуралд цагаатгах байр суурьтайгаа орж байгаа. Уг нь мөрдөх ажиллагааны явцад янз бүрийн зүйл тогтоогдсон болов уу гэж 11 сар хоригдсон. Гэтэл 124 хавтсыг хараад харамссан. Хавтсыг хавтаст хэрэг болгохын тулд л ийм зүйл хийсэн. Үүний 78 хавтас нь хэрэгсэхгүй болсон гэв. 

---