УИХ-ын чуулганы нэгдсэн хуралдаан үргэлжилж байна. Чуулганы хуралдаанаар ХХААХҮЯ-аас санал дэвшүүлсэн үхэр сүргийг ээмэгжүүлэх, бүртгэх саналыг хэлэлцэж байна. УИХ-ын гишүүн ХХААХҮ-ийн сайд Х.Болорчулуун чуулганы хуралдаанд дараах мэдээллийг өглөө.

ХХААХҮ-ийн сайд Х.Болорчулуун:

-Мал аж ахуйн талаар төрөөс баримтлах бодлогыг өөрчлөх цаг болсон. Дэлхийн цаг уур өөрчлөгдөж, дулаарал бий болж, өвс ургамлын гарц муудсан. Бэлчээрээр 100 хувь онд орох баталгаагүй болсон. Тооноос чанарт шилжих шаардлагатай.

Өнгөрсөн жил үхрийн махнаас бусдыг нь ямар ч квотгүй гаргасан. Энэ жил үхрийн махыг ч квотгүй экспортод гаргахыг зөвшөөрсөн. Өнгөрсөн жил 16 мянган тонн мах экспортод гаргасан. Энэ оны 10 сарын 1-ний байдлаар 53 мянган тонныг экспортод гаргасан. Экспортын тоо хэмжээг нэмэхийн тулд эрүүл бүс байгуулж, экспортод гаргах мал, махаа бэлдэх ёстой.

Тухайлбал, Уругвай улс 5 сая хүн амтай, 13 сая үхэртэй. Бүх үхрээ эрүүл бүс болгосон. Эрүүл бүс болгохын тулд үхрээ ээмэгжүүлсэн. Манай улс ч гэсэн үхрээ ээмэгжүүлэх ёстой. Бүртгэлжүүлэх шаардлагатай.  

Мөн үхрийг бэлчээрээр маллах бус фермерийн аж ахуй руу шилжүүлэх шаардлагатай. Малчид, аж ахуй эрхлэгчид ногоон тэжээл тариалахад идэвхтэй оролцож байна. Энэ жил ногоон тэжээл тариалалт өмнөх оныхоос 40 хувиар өссөн үзүүлэлттэй байна гэв. 

---