Х.Нямбаатарыг Нийслэлийн засаг даргад сонгох асуудлыг НИТХ хэлэлцэж байна. Хуралдааны үеэр Х.Нямбаатар нийслэлийн нийтийн тээврийн парк шинэчлэлтэй холбоотой асуудлаар байр сууриа илэрхийлэв.

Тэрбээр "Нийтийн тээврийн асуудлыг цаг алдалгүй шийдвэрлэх ёстой. 2023 онд багтаж худалдан авах тухай хуульд нийцүүлж, автобуснуудыг төлөвлөсөн тоо хэмжээгээр оруулж ирэх төлөвлөгөөтэй ажиллаж байна. Б.Дэлгэрсайхан сайд бид хоёр нийслэлийн нийтийн тээврийн хэрэгслийн парк шинэчлэлтэй холбоотой аж ахуй нэгж байгууллагуудын танилцуулгыг судалж байна. Эхний ээлжид энэ худалдан авах ажиллагааг хэрхэн хурдан дуусгавар болгох вэ. Авлига албан тушаалын асуудлаар АТГ шалгаж байгаа.

Худалдан авах тухай хуульд заасан шаардлагаа биелүүлээгүй евро-5 стандартын автобус нийлүүлээгүй евро-2 стандартын автобус нийлүүлсэн гэдэг нь батлагдсан. Өмнөх нийлүүлсэн автобуснаас гадна жижиг оврын автобуснууд хил дээр ирчихсэн байгаа гэнэ лээ. Мөн Skywell компанийн цахилгаан автобуснууд ирээд хүлээгээд авчихсан байгаа. Тэгэхээр энэ эрхзүйн маргааныг хэрхэн шийдвэрлэх үү гэдэг процесс явна.

Үлдсэн мөнгөндөө худалдан авалтыг хэрхэн яаж зохион байгуулах уу. Автобус ирсэн тохиолдолд хувийн компаниудад ямар нөхцөлтэй хүлээлгэж өгөх вэ. Элэгдэл хорогдлыг эргэн төлөлтийг яаж тооцох вэ гэх мэтчилэн гурван багц асуудлыг шийдэх шаардлага байгаа. Мэдээж ажлаа авсны дараа ажлын хэсэг байгуулаад нэн яаралтай шийдэх боломжтой гэж харж байна" гэлээ.

---