УИХ дахь МАН-ын бүлгийн хуралдаанаар гурван асуудал өнөөдөр хэлэлцсэн байна. Хуралдаанаар хэлэлцсэн асуудлын талаар УИХ дахь МАН-ын бүлгийн дарга Д.Тогтохсүрэн болон ХЗДХ-ийн сайд Б.Энхбаяр, Сангийн сайд Б.Жавхлан нар мэдээлэл өгөв .

УИХ дахь МАН-ын бүлгийн дарга Д.Тогтохсүрэн:

-Бүлгийн хурлаар гурван асуудал хэлэлцлээ. Нэгдүгээрт, Монгол Франц хоёрын хооронд ураны салбарт хамтран ажиллах асуудлыг дэмжих тухай байлаа. Энэ асуудлыг хэлэлцэж, дэмжсэн.

Хоёрдугаарт, 2024 оны төсвийн төслийг хэлэлцсэн. Манай бүлэг төсвийн төслийг хэлэлцэж, батлах нь зүйтэй гэж үзлээ. Үүнтэй холбогдуулан 12 хүний бүрэлдэхүүнтэй ажлын хэсэг гарч байгаа.

Гуравдугаарт, хүүхэд гэр бүлийн хамгаалах, түүний эрхзүйн асуудлыг боловсронгуй болгох асуудлыг хэлэлцсэн. ХЗДХ-ийн сайд Б.Энхбаяр тодорхой хуулийн төслүүдийг санаачилсан байна. Бүлэг үүнийг хэлэлцээд бүрэн дэмжлээ. Ийм гурван чухал асуудлыг хэлэлцэж, тодорхой шийдвэрүүдийг гаргалаа.

ХЗДХ-ийн сайд Б.Энхбаяр:

-Ерөнхий сайд өнгөрсөн баасан гарагт намайг дуудаж шуурхай үүрэг, даалгавар өгсөн. Бага насны хүүхдийн хүчирхийллийн эсрэг ялын бодлогыг чангатгах багц хуулийн төслийг яаралтай боловсруулж, УИХ-д энэ долоо хоногт өргөн барих үүрэг өгсөн. Энэ дагуу багц хуулийг өнөөдөр МАН-ын бүлэгт танилцууллаа. Эрүүгийн хуулийн өөрчлөлтийн болон Гэр бүлийн тухай хуулийг шинэчилсэн найруулга хэлбэрээр өргөн барих, Гэр бүлийн шүүх байгуулахтай холбоотойгоор Шүүх байгуулах тухай зэрэг дөрвөн багц асуудлын хүрээнд холбогдох хууль тогтоомжийн төслийг боловсруулсан.

Нэгдүгээрт, Бага насны хүүхдийг алах, хүчиндэх, бэлгийн мөлжлөгийн эсрэг хүн худалдаалах гэмт хэргийн хөөн хэлэлцэх хугацаа 20 жил байгааг 30 болгох,

Хоёрдугаарт, хүнийг алах гэмт хэргийн бүрэлдэхүүн бага насны хүүхдийг алах, хүчиндэх, бэлгийн мөлжлөг, хүүхдийн эсрэг хүн худалдаалах гэмт хэрэгт өршөөл үзүүлэхгүй,

Гуравдугаарт, хүнийг алах гэмт хэргийн хүндрүүлэх бүрэлдэхүүн, бага насны хүүхдийг алах, бага насны хүүхдийг хүчиндэх, бага насны хүүхдийн эсрэг бэлгийн мөлжлөг, хүүхдийн эсрэг хүн худалдаалах гэмт хэрэг, 22 дугаар бүлэгт заасан авлигын гэмт хэрэг үйлдсэн ялтанг хорих ялаас хугацаанаас өмнө суллахгүй,

Дөрөвдүгээрт, Бага насны хүүхдийг алах, хүчиндэх гэмт хэргийн ялын дээд хэмжээ 20 жил байгааг 25 жил болгох

Тавдугаарт, 1984 оны Эрүүгийн хуулиас хойш өөрчлөгдөөгүй байсан бага насны хүүхэд гэдэг насны ангилал 14 байгаа. 1984 оноос хойш энэ ангиллыг өөрчилж байгаагүй. Эрүүгийн хууль дахь бага насны гэх ойлголтын 14 гэх насыг 16 болгож нэмэгдүүлэх өөрчлөлт оруулах саналыг дэвшүүлж байна. Ингэснээр Эрүүгийн хуульд байгаа 10 гаруй гэмт хэргийн буюу 14-16 насны хүүхдийн эсрэг үйлдэгдэж байгаа бүх гэмт хэргийн ялын бодлого чангарч байгаа.
Тухайлбал, 14-16 насны хүүхдийг алах гэмт хэрэгт 8-15 жил оноож байгааг 12-25 жил эсхүл бүх насаар хорих,
14-16 насны хүүхдийг хүчиндэх гэмт хэрэгт 5-12 жил оноож байгааг, 12-25 жил эсхүл бүх насаар хорих
14-16 насны хүүхдийн эсрэг бэлгийн дур хүслээ ёс бусаар хангах гэмт хэрэгт 1-5 жилийн ял оноож байгааг 2-8 жил болгож, тэнсэхгүй, 14-16 настай хүүхдийн эсрэг бэлгийн мөлжлөг үйлдэх гэмт хэрэг 2-8 жил хорих ялтай байгааг 12-20 жил эсхүл бүх насаар нь хорих ялтай болгоно өөрчилнө.

Мөн согтуугаар тээврийн хэрэгсэл жолоодсон бол зөрчил биш гэмт хэрэгт тооцдог болно. Та согтуугаар тээврийн хэрэгсэл жолоодсон л бол гэмт хэрэгтэнд тооцогдоно. Одоогоор манай улсад 30-33 мянган согтуугаар тээврийн хэрэгсэл барьж байгаад зөрчлөөр торгуулсан дүн мэдээлэл байна. Жилд дунджаар 26 мянган гэмт хэрэг бүртгэгддэг. Энэ тоо хоёр дахин нэмэгдэнэ гэв. 

---