Хууль зүй, дотоод хэргийн сайд Б.Энхбаяр цагдаа, дотоодын цэргийн анги, байгууллагын удирдах алба хаагчидтай өнөөдөр уулзалт хийлээ. Уулзалт хийх үеэр  гэмт хэргийн мөрдөн шалгах ажиллагааны нууц задруулахыг таслан зогсоохыг үүрэг болголоо.

Хууль зүй, дотоод хэргийн сайд Б.Энхбаяр: 

-Сүүлийн жилүүдэд гэмт хэргийн мөрдөн шалгах ажиллагааны нууцыг задруулдаг асуудал хэрээс хэтэрлээ. Монгол улсын үндсэн хуульд зааснаар Шүүхийн шийдвэр гараагүй байхад хэнийг ч гэм буруутан гэж буруутгаж болохгүй. Энэ зарчим эвдэгдэж хэвийн үзэгдэл болсон байна. Тийм учраас хууль сахиулах байгууллагын албан хаагчдын өөрсдийн оролцоотой гэмт хэргийн мөрдөн шалгах ажиллагааны нууцыг задруулдаг явдлыг нэн даруй таслан зогсооно. Энэ бол гэмт хэрэг. Энэ гэмт хэрэг одоогоор торгох болон зорчих эрхийг хязгаарлах ялтай байна. ХЗДХ-ийн сайдын хувьд шалгаж байгаа хэргийн мэдээллийг задруулдаг асуудлын ял шийтгэлийн бодлогыг чангаруулах саналыг УИХ-д оруулж хэлэлцүүлнэ.

Энэ төрлийн гэмт хэргийг мөрдөн шалгах бие даасан газар байгуулахыг сануулж байна. Олон нийтэд хандаж хэлэхэд, бага насны хүүхдийн хэрэгт ухаалаг, хүлээцтэй хандаж, зураг бичлэгийг олон нийтийн сүлжээнд дэлгэрэнгүй мэдээлэхээс татгалзаарай. Хүн байж, талийгаачийг хүндэтгэж, мэдээлэл түгээхдээ анхааралтай хандахыг хүсье. Цагдаагийн байгууллага илд байх үүргээ сайн биелүүлэхийг хүсье. Би хамгаалагч нь байх болно гэв.

---