Нийтэлсэн:   Admin

1 жилийн өмнө

Ирвэс айлын хот руу орсон, мал идсэн гэх гурван ч дуудлага ойрын үед гарсан талаар БОАЖЯ-наас мэдээллээ. Тухайлбал, Мөнххайрханы байгалийн цогцолборт газрын хамгаалалтын захиргааны Булган гол Их онгог чиглэлийг хариуцсан байгаль хамгаалагчид цоохор ирвэс айлын хотонд орж, мал барьсан дуудлагаар ажиллажээ. 

Мэдээллийг нягталж, мал барихаас гадна хүний биед халдаж болзошгүй байсан тул Ховд аймгийн Булган сумын нутаг ТХГ-ын хязгаарлалтын бүс болох Булган голын Шургуй хэмээх газрын ойр орчмын бүс нутагт цагдаа, онцгой байдлын газар, сумын байгаль хамгаалагч, хамгаалалтын захиргааны байгаль хамгаалагч нартай хамтран гурав хоног ажиглалт, хамгаалалт хийсэн байна.

Мөн, тусгай хамгаалалттай газрын хязгаарлалтын бүс Ярантын тохой гэдэг газарт нэг цоохор ирвэс айлын хашаанд орж мал барьсан бөгөөд маргааш нь дахин ирж барьсан малаа идээд явсныг байгаль хамгаалагчид автомат камерын зургаар баримтжуулсныг та бүхэн харж байна. 

Үүнээс гадна, Мөнххайрханы БЦГ-ын орчны бүс Ховд аймгийн Мөнххайрхан сумын Алаг багийн нутаг Эмгэний ам гэдэг газар малчин Мөнхтөрийн мал руу ирвэс орж нэг хонь барьсан гэсэн мэдээллийн дагуу ажиллажээ. 

Сурталчилгаа