Г.Ганжаргалыг амь насаа алдах үед хамт байсан эмч, багш нар нь шинжээчийн бүрэлдэхүүнд орж дүгнэлт гаргах гэж байгааг эсэргүүцэж талийгаачийн эхнэр мэдээлэл хийв. 

Талийгаачийн эхнэр А.Отгонцэцэг:

-Хэрэг гарах үед талийгаачтай минь хамт байсан эмч, багш нарыг шинжээчийн бүрэлдэхүүнд оруулаад дүгнэлт гаргах гэж байгааг эсэргүүцэж байна. Нүүр ам судлалын салбарт хүчин зүтгэж явах үедээ нэг салбарт ажилладаг хамт олон дотроо амь нас нь эрсдсэн байхад, яагаад заавал Нүүр ам судлалын салбар зөвлөлийг оролцуулах гэж тэгж зүтгээд дайраад байгааг ойлгохгүй байна.

Миний хувьд олон удаа дээд шатны хүмүүст эдгээр хүмүүсийг оруулмааргүй байна гэж саналаа хэлсэн ч авч хэлэлцээгүй. Нийт таван салбар зөвлөл байгаа. Нүүр ам судлалын салбар зөвлөлд хэргийн материалыг өгчихсөн байх вий гэж хардаж байна. Хэрэгт ямар ч хамааралгүй салбар шүү дээ. 

Прокурор, мөрдөгч нар хэрэгт хувийн ашиг сонирхол, хөндлөнгийн нөлөө орох нөхцөлийг шууд бүрдүүлж байгааг эсэргүүцэж байна. Энэ бүхний цаана нөлөө бүхий албан тушаалтны нөлөөлөл орж байна гэж хардах бодит үндэслэлүүд маш их. Нүүр амны салбар зөвлөлийн бүрэлдэхүүнд Ч.Гантөмөр, Б.Батбаяр эмч нарыг оролцуулж байгааг эсэргүүцэж байна.

Өмнөх дүгнэлтүүдийг баталж чадахгүй байгаа. Өндрөөс унасан юм уу, унаагүй юм уу гэдгээ одоо байгаа салбар зөвлөл тайлбарлаж чадахгүй, ахиад шинжилгээ хийх гэж байна.

Нөхрийг минь амь насаа алдах үед хажуу орон дээр нь унтаж байсан гэх Ч.Гантөмөр нь өглөө талийгаачийг минь цонхоор хараад огт таниагүй, хачирхалтай нь тэр хүн өчнөөн олон жил хамт нэг сургуульд багшилж, найзалж байсан боловч талийгаачийг хараад таниагүй байхад, өмнөх шөнө нь л дөнгөж ирж танилцсан Архангайн эмч харсан даруй шууд таньсан байдаг. 

Нүүр ам судлалын сургуулийн захирал Б.Батбаяр нь Нүүр амны салбар зөвлөлийн гишүүн бөгөөд албан ёсны жилийн чөлөөтэй байсан хүнд албадан хүч хэрэглэн авч явсан. Хэрэг болсон тухай хамт байсан бусад эмч нараасаа 4 цагийн турш нуун дарагдуулж, өндрөөс унасаныг нь хараагүй байж бусдад худал ташаа мэдээлэл өгч байсан зэрэг сэжиг бүхий хардах үндэслэлүүд маш их байсан.

Бид Нүүр ам судлалын салбар зөвлөлд мөрдөгч, аль хэдийн хавтаст хэргийн материалаа уншуулааад, хэргийн материалын нууц мэдээлэлүүд алдагдсан байх вий гэдгээс хамгийн ихээр санаа зовж байна гэв.

 

 

---