Нийслэлийн авто замын түгжрэлийг бууруулах ажлын хүрээнд нийтийн тээврийг үе шаттай шинэчлэх ажлууд хийгдээд, олон жил болж байгаа хэдий ч дорвитой өөрчлөлт гардаггүй.

Хамгийн ноцтой нь “Эрдэм транс” ХХК нийслэлийн нийтийн тээвэрт үйлчилгээ үзүүлэх 135 автобусыг БНСУ-аас оруулж ирэхдээ арлын дугаар болон оныг нь засварлаж, хуурамч бичиг баримт бүрдүүлэн “шинэ автобус” оруулж ирсэн хэмээн улсын төсвөөс их хэмжээний санхүүжилт гаргуулан авчээ.

Тодруулбал, нийслэл Улаанбаатар хотод нийтийн тээврийн үйлчилгээ үзүүлдэг томоохон компаниудын нэг болох “Эрдэм транс” ХХК БНСУ-д үйлдвэрлэгдсэн “Хьюндай” маркийн автобусыг импортлон оруулж ирэхдээ 135 автобусны “арлын дугаар” болон оныг засварлаж, хуурамч бичиг баримт бүрдүүлсэн нь тогтоогджээ. Уг хэрэг залилан болон их хэмжээний мөнгө угаах давтан үйлдлээр яг одоо хуулийн байгууллагад шалгагдаж байна.

Бүр ноцтой нь, нийслэлийн нийтийн тээврийн үйлчилгээнд шинэхэн автобус явуулна гэж хуурамч арлын дугаартай, хуучин автобусуудыг Авто тээврийн үндэсний төв болон нийтийн тээврийн газарт бүртгүүлсэн нь шалгалтаар илэрчээ.

Мөн энэ дагуу ЦЕГ-ын Эрүүгийн цагдаагийн албанаас “Эрдэм транс” ХХК-ийн оффис болон нэр бүхий авто баазуудад нэгжлэг, шалгалт хийхэд нийт 189 автобусны 135-ыг нь ийнхүү хуурамч бичиг баримт бүрдүүлэн “шахсан” нь тогтоогдсон байна.

Товчхондоо, “Эрдэм транс” гэдэг компани бол хохирогч биш, залилагч байжээ. Учир нь тэд нийслэлийн нийтийн тээврийн үйлчилгээнд гарч буй автобусуудын 70-68 хувийнх нь оныг засчихсан байдаг гэсэн үг.
Үүний цаана нийслэлийн хэдэн мянган иргэний эрх ашиг, амь амьдралыг өнөөг хүртэл хохироосоор байгаа юм.

Эргэн сануулахад, 2020 онд 10 автобусны арлын дугаарыг хуурамчаар хийсэн хэрэгт холбогдож байсан билээ.

---