Булган аймгийн Орхон сумын хэсгийн төлөөлөгч О.Цэлмэг нь Монголын цагдаад бугшсан асуудлыг илчилж, наймдугаар сарын 15-наас эхлэн өөрийн цахим хуудсаар үзэл бодлоо илэрхийлжээ. Түүний хөндсөн асуудал өчигдрөөс олны анхааралд өртөж, улмаар холбогдох албан тушаалтнуудад өнөөдөр хариуцлага тооцлоо. 

Хэргийн талаар сануулбаас, О.Цэлмэг нь ОХУ-д төгссөн, Чингэлтэй, Сүхбаатар дүүргийн цагдаагийн хэлтэс болон Эрүүгийн цагдаагийн албанд ажиллаж байгаад 2022 оны аравдугаар сарын 7-нд Булган аймгийн Орхон суманд хэсгийн төлөөлөгчөөр томилогдон очжээ. 

Гэтэл өнгөрсөн хугацаанд өөрт нь хуваарилагдсан хэргүүдийн бараг 90 хувийг шийдвэрлэж, ажлаа цаг хугацаанд хийсээр ирсэн байхад цалинг нь 2023 оны 1 дүгээр улиралд 20 хувиар, хагас жилээр 10 хувиар тус тус хасжээ. Энэ бүхэн нь бусад том цолтой цагдаагийн албан хаагчдад "байдаг л асуудал" мэт боловч залуу албан хаагчдын хувьд хүндээр тусдаг байна. Иймд энэ талаар удирдлагуудаасаа лавлаж асуухад, эхний хасалтын хувьд "Булганы цагдаа улсын хэмжээнд "Хүүхэд хамгаалал" арга хэмжээний хүрээнд 21 аймгаас 21-т орсон учир" гэсэн бол, дараагийн асуудлын хувьд "Танай эрүүгийн тасгийн ажил унасан болохоор цалин хассан" гэж хариулжээ. 

Иймд тэрээр үүнийг эсэргүүцэж, алийн болгон дуугүй байдаг юм бэ, үг дуугүй үүрэг биелүүлээд яваад байхаар Булган аймгийн цагдаагийн удирдлагууд элэг бариад байгаа юм уу, ажил цалгардуулсан хүмүүсээс цалин хасдаггүй юм уу гэсэн асуудлыг дэвшүүлэн тавьж, шүгэл үлээжээ. 

Улмаар Булган аймгийн цагдаагийн газрын удирдлагууд болох газрын даргаар ажиллаж байсан хурандаа Л.Ганбаатар, дэд дарга дэд хурандаа Б.Баттулга, Захиргааны тасгийн дарга, дэд хурандаа Б.Өнөрбат, Замын тасгийн дарга, дэд хурандаа Д.Мягмаржав нарт хариуцлага тооцох, шударга ажиллах, үнэн үг хэлсэн албан хаагчийг гадуурхаж, дарамтлахгүй байхыг хүссэн нь өнөөдөр олны сонорт хүрч, өнөөдөр Цагдаагийн ерөнхий газраас шийдвэр гарлаа. 

Хууль зүй, дотоод хэргийн сайдын тушаалаар Цагдаагийн ерөнхий газрын дэд даргаар удирдуулсан ажлын хэсэг Булган аймагт томилогдон ажиллаад, тухайн үед Булган аймгийн цагдаагийн газрын даргаар ажиллаж байсан цагдаагийн хурандаа Л.Ганбаатарыг ажлаас нь чөлөөлж, дэд даргыг тушаал бууруулжээ. 

Мөн, хэсгийн төлөөлөгч О.Цэлмэгийг албаны нууцтай холбоотой мэдээллийг олон нийтэд задруулсан эсэх дээр нь хэрэг үүсгэн шалгаж байгааг ч нуусангүй. 

---