Улаанбаатар хотноо энэ сарын 23 хүртэл үргэлжлэх Азийн залуучуудын наадмын нээлт өнөөдөр Төв цэнгэлдэх хүрээлэнд болно.

Зүүн Азийн залуучуудын наадам 11 спортын 12 төрлөөр зохиогдоно. Тэр дундаа сагсан бөмбөг нь 3х3 төрөл, мөн сонгодог сагс буюу 5х5 гэсэн хоёр ангиллаар болно. Зүүн Азийн олимпын хороо нь есөн үндэсний олимпын хороог өөртөө нэгтгэдэг. "Улаанбаатар 2023" Зүүн Азийн залуучуудын наадамд үндэсний олимпын 7 хорооны 870 гаруй тамирчин өрсөлдөнө. Эдгээр тамирчны дасгалжуулагч, албаны болон зохион байгуулагчдын бүрэлдэхүүн нэмэгдэн, нийт 1600 орчим албан ёсны оролцогчтой байх юм.

Нээлтийн ёслолын үеэр ямар үйл ажиллагаа зохион байгуулах талаар "Улаанбаатар Зүүн Азийн алуучуудын наадмыг зохион байгуулах хороо" ХК-ийн Үйл ажиллагаа хариуцсан захирал Ц.Бат-Энх:

-Нээлтийн ёслол үдэш 20.23 цагаас Төв цэнгэлдэх хүрээлэнд эхэлнэ. “Өнгөрсөн, одоо, ирээдүй” гэсэн үндсэн агуулгын хүрээнд найрууллаа. Энэ үеэр Монголын эртний домгоос сэдэвлэсэн үзүүлбэр, тоглолт, лазер шоу зэрэг олон сонирхолтой урлаг соёлын үйл ажиллагааг бэлтгэсэн. Тэмцээний хуваариас хамааран цөөн тооны спортын заалны тохижилт үргэлжилж байгаа. Тэмцээнд оролцож буй тамирчдыг бэлтгэл хийх боломжоор хангахаас гадна дотоод дахь тээвэрлэлт, аюулгүй байдал зэргийг бүрэн хангасан гэв.

Зүүн Азийн олимпын зөвлөл нь Олон улсын олимпын хорооны бүс нутгийн бүх үйл ажиллагааг хариуцдаг, анхан шатны нэгж юм. Манай улс тус наадмыг эх орондоо зохион байгуулах эрхийг авах гэж 2014 онд өрсөлдөөд, Тайванд ялагдаж байсан бол 2017 онд ахин өрсөлдөн, эрхээ авчээ.

Наадмын хаалт энэ сарын 23-нд Сүхбаатарын талбайд болно.

 

---