Сүүлийн хоёр хоногт үргэлжлэн орсон борооны улмаас Улаанбаатар хотын зарим хэсэг усанд автаж, тог цахилгаангүй болоод байгаа билээ. Ялангуяа, Сүхбаатар дүүргийн 1 дүгээр хорооны нутаг дэвсгэрт байдал улам бүр хүндрээд байна.

Усны урсацад саад болж байгаа хоёр ч гүүрийг нураах шийдвэрийг Нийслэлийн Засаг даргаас гаргасан. Мөн, Монгол улсын Ерөнхий сайд "Голын эрэг, далан дээр хууль зөрчин байгуулагдсан барилга байгууламжийг шаардлагатай бол нураах" үүргийг өгөөд байгаа. 

Иймд үер усны аюулаас сэргийлэх үүднээс олон нийтийн арга хэмжээг цуцлах захирамжийг Нийслэлийн Засаг даргаас гараад байгаа юм. 

Гачуурт дахь "Монгол шилтгээн"-д гурав хоног үргэлжлэх "Playtime festival-2023" өнөөдрөөс эхэлсэн. Тус наадмыг зохион байгуулагчдад "арга хэмжээгээ цуцлах" шаардлагыг нийслэлээс хүргүүлсэн боловч, хүлээн авахаас татгалзжээ. 

"Гачууртад бороогүй, цаг агаар тогтуун, Туул голоос хол учир цуцлах бодит шаардлага үүсээгүй" гэж зохион байгуулагчид тайлбарласан байна. 

---