Амиа алдсан эмч Г.Ганжаргалын ар гэрийнхэн талийгаачийн үхлийн шалтгааныг тогтоон өгөхийг шаардан мэдээлэл хийв. 

-Жилд 100 орчим хүн өндрөөс унаж нас бардаг гэх мэдээлэл байна. Энэ хэргүүд хэрхэн шийдэгдэж байгаа вэ. Миний найзын хэрэг нь ардаа маш их эргэлзээг дагуулж байна. Хамгийн анх өндрөөс унасан гэх дуудлага бүртгэгдсэн байгаа юм. Энийг харсан гэрчлэх гэрч байх ёстой. Яагаад цагдаагийн байгууллага хоцорч ирэв. Хамт байсан хүмүүст нь гурван цагийн дараа багш чинь өндрөөс унаж нас барсан гэж хэлсэн бэ. Яагаад ийм дүгнэлт хийчихсэн юм бэ. Анхнаасаа энэ хэргийг өндрөөс унасан байна шүү гээд мэдээлчихсэн. Гэсэн атал өндрөөс унасан гэдгийг нь шинжлэх ухааны үндэстэй нотолж чадахгүй байна.

-Хэргийн газрын үзлэгийг нэр бүхий таван шинжээч, мөрдөгч дутуу хийсэн. Хурууны хээний бэхжүүлэлтийг дутуу хийсэн. Хот руу хэрэг нь шилжсэний дараа хурууны хээг дараа нь явуулсан байгаа юм. Амьсгал боогдсон ул мөр байсан. Хүчилтөрөгч дутагдахаар ямар шинж тэмдэг илэрдгийг шинжлээгүй. Талийгаачийн хувцсанд шинжилгээ хийх ёстой. Гэтэл тэр хувцсыг нь торонд боогоод бидэнд өгсөн. Хувцас дээр нь цусны толбо үүссэн үгүйг ч шинжлээгүй. Мөн талийгаачийг доош харсан байдалтай, нэг тагт онгорхой байсан гээд л өндрөөс унасан гэж дүгнэчихсэн. Бусад төрлийн үзлэгийг огт хийгээгүй. Хамт байсан хүмүүсийг биед ч үзлэг хийгээгүй. Хэргийн газрын үзлэгийг санаатай буруу, дутуу хийсэн хүмүүсийг АТГ-д өгсөн. Энэ таван хүмүүст хэрэг бүртгэлийн хэрэг нээгээд шалгаж байна.  Өндрөөс унах туршилтыг хийх хүсэлт олон удаа тавьсны эцэст хийсэн.

-Нөхөрт маань хоёр удаагийн задлан шинжилгээ хийсэн. Одоо гурав дахь задлан шинжилгээ хийх тогтоол гарчихлаа. Анхны болон давтан шинжилгээнүүд нь хоорондоо зөрүүтэй учир дахин шинжилгээ хийхээр болсон. Энэ дахин шинжилгээнд гэмтлийн чиглэл бүрийн эмч нарыг оролцуулж өгөөч гэж хүсэж байна. Өндрөөс унасан гэсэн хэрнээ дотор эрхтэн нь зүгээр, гавлын яс нь хоёр хуваагдаж, хоолойд нь боосон мэт хөхрөлт үүссэн байсан байхад гадны нөлөөгүй гэсэн шинжээчийн дүгнэлтийг үндэслэлгүй гэж үзэж байна гэлээ. 

---