Төр хувийн хэвшлийн түншлэлийн хүрээнд “Кью Эс Си” компани нь Дарханы төмөрлөгийн үйлдвэрт хөрөнгө оруулалт хийн, ажиллаж байсан ч тодорхой үүргээ биелүүлээгүй үндэслэлээр өнгөрсөн оны дөрөвдүгээр сард Засгийн газрын шийдвэрээр, төрийн мэдэлд эргүүлэн авсан байдаг.

Өнгөрсөн хугацаанд тус үйлдвэрт шалгалт хийгээд “Кью Эс Си” компани нь төрд 2.6 их наяд төгрөгийн хохирол учруулсан гэх дүгнэлт гарчээ. 2014 онд концессын гэрээгээр “Кью Эс Си” ХХК нь барих, ашиглах, шилжүүлэх гэрээгээр зургаан төсөл хэрэгжүүлэх байсан ч 2015 онд гэрээний нөхцөлийг барих, шилжүүлэх болгон өөрчилсөн байдаг. Тодруулбал төмөр зам, авто замын төлбөрийг хуйвалдааны замаар 240 тэрбум төгрөгийг улсаас авчээ. Мөн 3.5-5 их наяд төгрөгийн борлуулалтын орлогыг хүдрээс олох боломжтой байсан боловч тухайн үед борлуулалтын орлогыг 1.8 тэрбум төгрөг гэж тооцсон гэх зэрэг зөрчлийн жагсаалт үргэлжилнэ.

“Кью Эс Си” компани нь концессын гэрээгээр ашиглуулсан тухайн хугацаанд уг үйлдвэрт ямар ч бүтээн байгуулалтын ажил хийгдээгүй бөгөөд үйлдвэрийн борлуулалтын орлогыг компани руугаа шилжүүлдэг, өмч хөрөнгийг барьцаалан зээл авсан зэрэг олон зөрчил ч мөн илэрчээ. ЗГХЭГ-ын дарга Д.Амарбаясгалан Улсад 2,6 их наяд төгрөгийн хохирол учруулсан этгээдүүдийн асуудлыг хууль хяналтын байгууллага үнэн зөвөөр, хурдан шуурхай шийдвэрлэх шаардлагатай. Монгол улсын иргэдийн баялгаасаа хүртэх ёстой боломжийг хулгайлсан этгээдүүдтэй Засгийн газар тэмцэнэ гэж мэдэгдлээ.

“Дарханы төмөрлөгийн үйлдвэр” нь концессын гэрээг цуцалж, төр өмчөө хүлээн авах үед 1,8 тэрбум төгрөгийн алдагдалтай байсан бол үйлдвэр, экспортоо эхлүүлснээс хойш оны эхний таван сарын байдлаар 15,2 тэрбум төгрөгийн татварын дараах ашигтай ажиллажээ. Мөн улсын төсөвт 9,9 тэрбум төгрөгийн орлого төвлөрүүлсэн байна.

---