Улсын Их Хурлын Төсвийн байнгын хорооны өнөөдрийн хуралдаанаар Монгол Улсын Үндсэн хуулийн цэцийн 2023 оны 4 дүгээр дүгнэлтийн хэлэлцээд хүлээж авах нь зүйтэй гэж үзжээ. 

Улсын Их Хурлын Төсвийн байнгын хорооны өнөөдрийн хуралдаанаар Монгол Улсын Үндсэн хуулийн цэцийн 2023 оны 4 дүгээр дүгнэлтийн хэлэлцлээ. Хэлэлцэж буй асуудалтай холбогдуулан Улсын Их Хурлын гишүүн Б.Пүрэвдорж, Б.Баттөмөр нар үг хэлсний дараа Онцгой албан татварын тухай хуулийн Монгол Улсын Үндсэн хууль зөрчсөн гэсэн зүйл, хэсэг, заалт бүрээр тус тусад нь санал хураалт явуулан шийдвэрлэжээ.

Тухайлбал, "Онцгой албан татварын тухай хуулийн 4 дүгээр зүйлийн 4.1 дэх хэсгийн 4.1.5 дахь заалтад "газрын тосны үйлдвэрлэлийн дайвар бүтээгдэхүүн, керосин." гэж заасан нь Монгол Улсын Үндсэн хуулийн Нэгдүгээр зүйлийн 2 дахь хэсгийн "... тэгш байдал, ... хууль дээдлэх нь төрийн үйл ажиллагааны үндсэн зарчим мөн." гэж заасныг зөрчсөн байна гэснийг хүлээн зөвшөөрөх нь зүйтэй" гэсэн саналын томьёоллоор санал хураахад, хуралдаанд оролцсон гишүүдийн 60  хувь нь дэмжсэн байна. Мөн Онцгой албан татварын тухай хуулийн 4 дүгээр зүйлийн 4.1 дэх хэсгийн 4.1.5 дахь заалтад "газрын тосны үйлдвэрлэлийн дайвар бүтээгдэхүүн, керосин." гэж заасан нь Монгол Улсын Үндсэн хуулийн Тавдугаар зүйлийн 4 дэх хэсгийн "Төр нь үндэсний эдийн засгийн аюулгүй байдал, аж ахуйн бүх хэвшлийн болон хүн амын нийгмийн хөгжлийг хангах зорилгод нийцүүлэн эдийн засгийг зохицуулна” гэж заасныг зөрчсөн байна гэснийг хүлээн зөвшөөрөх нь зүйтэй" гэсэн саналын томьёоллоор санал хураахад, хуралдаанд оролцсон гишүүдийн олонх дэмжсэн байна.  

Үндсэн хууль зөрчсөн Онцгой албан татварын хуулийн асуудлаар УИХ-ын гишүүн Б.Баттөмөрөөс тус асуудлаар тодрууллаа. 

УИХ-ын гишүүн Б.Баттөмөр:

-Лоббидож орж ирсэн эсэхийг Б.Пүрэвдоржоос асуух хэрэгтэй. Иргэд маань нэг зүйлийг анхаарах хэрэгтэй. Манай улс 1.8 сая тонн нефть импортолдог. Энэ хэмжээ сүүлийн үед буурсан. Яагаад буурсан гэхээр найруулдаг хэмжээ нь нэмэгдсэнтэй холбоотой. 2015-2021 оны хооронд 200 тэрбум төгрөгийн онцгой албан татвар улсын төсөвт ороогүй. Хэрэв импортолдог компаниуд бүрдүүлэлтээ хийгээд оруулсан бол 200 тэрбум төгрөгөөр төсөв нэмэгдэх байсан.

Хоёрдугаарт, дайвар бүтэгдэхүүний үйлдвэрт дахин боловсруулж бүтээгдэхүүн үйлдвэрлэдэг нэг ч үйлдвэр байхгүй. Сэнс тавиад үлээлгээд холиод нийлүүлж байна. Энэ ямар хортой вэ гэхээр амьсгалах эрхтэнд нөлөөлнө. Машин техникийн мотор эвдэрнэ. Үндэсний аудитын газраас дайвар бүтээгдэхүүнд төрийн хяналт алдагдаж, бодлого алдсан гэсэн дүгнэлт гаргасан. Ийм технологи дэлхийн хаана ч байхгүй. Найруулдаг компаниудын 360 вагон төмөр зам дээр зогсож байна. Үндсэн хуулийн цэцийн дүгнэлт гаргуулаад олоо татваргүйгээр авах гэж байна.

Би топ татвар төлөгч. Тэс петролиум компанийн хувьцаа эзэмшигч. Би татвар төлөгч хүнийхээ хувьд байнгын хорооны хуралдаанд орж үг хэлсэн. Хоёр ч байнгын хороогоор ҮХЦ-ийн дүгнэлтийг хүлээж авах нь зүйтэй гэж үзчихлээ. Надад ашиг сонирхлын зөрчил байхгүй харин татварыг шударга болгоод өг гэдгийг л хэлсэн. Татварын асуудлыг ҮХЦ шийдэх ёстой юм уу, үгүй юм уу гэв. 

---