УИХ-ын Төсвийн байнгын хороо хуралдаж байна. Хуралдаанаар үеэр УИХ-ын гишүүн Д.Өнөрболор Эрчим хүчний яам иргэдийнхээ эрүүл аюулгүй амьдрах эрхийн эсрэг агаарын бохирдлыг бууруулах бодлогоос ухарч байгаад шүүмжлэлтэй хандав.  

УИХ-ын гишүүн Д.Өнөрболор:

-Эрчим хүчний эх үүсвэрийг нэмэгдүүлэхийг бодлогын хувьд дэмжиж байгаа. Эрчим хүчний яам иргэдийнхээ эрүүл аюулгүй амьдрах эрхийн эсрэг агаарын бохирдлыг бууруулах бодлогоос ухарч байна. Агаарын бохирдол мөнхийн сэдэв байж ирсэн. Агаарын бохирдлыг бууруулах хүрээнд өчнөөн ажил хийж хэрэгжүүлсэн ч одоо түүхий нүүрс түлдэг яндангуудыг нэмэгдүүлэх гэж байна, түүхий нүүрс түлнэ гэдэг асуудал оруулж ирж байна. Дэлхий дээр эрчим хүчийг нэмэгдүүлэх маш олон арга зам бий. Хотод ялгамжтай байдлаар энэ зохицуулалтыг оруулж ирэх шаардлагатай.

Эрчим хүчний сайд Б.Чойжилсүрэн

-Энэ хууль 2029 он хүртэл дагаж мөрдөгдөнө. Газ руу шилжихгүй л бол бид нүүрснээс салах боломж байхгүй. Ард түмэндээ худлаа амлахаа больё гэж бодож байгаа. Манай улсаар дамжих хийн хоолойг өөдрөгөөр төсөөлөхөд 2029 онд ашиглалтад орохоор байгаа юм. Тэр болтол амьдрал үргэлжилнэ. Улаанбаатар хотод 200 айлын янданг нийлүүлээд 1.5 МГв хүчин чадалтай дулааны станц байгуулъя гэж байгаа. Улаанбаатар өмнө нь Багануурын нүүрс түлдэг байсан бол одоо Эрдэнэс Тавантолгойн нүүрс түлж байгаа. Нүүрс түлсэн тохиолдолд огт утаагүй болохгүй. Утааг багасгах тухай л ярьж байгаа. Ард түмэнд худлаа ярьсаар байгаад буруу хүлээлт үүсгэдэг болчихсон.

УИХ-ын гишүүн Д.Өнөрболор:

-Энэ хуулиа татаж аваач ээ. Чойжилсүрэн сайд аа, та нүүрснээс өөр сонголтгүй гэж хэлж байгаагаасаа ичих хэрэгтэй. Эрчим хүчний яам ингээд яриад сууж болохгүй. Өнөөдөр миний өөдөөс хараад инээгээд сууж байна. Намар та нар бодит нөхцөлөө хараад инээдэм үү, ханиадам уу гэдгээ мэдрэх байх.

Эрчим хүчний сайд Б.Чойжилсүрэн

-Д.Өнөрболор гишүүнээ тантай маргах ямар ч сонирхол байхгүй. Бодит байдлаа ойлгоцгооё гэж байгаа юм. Та өөрөө өөртэйгөө зөрчилдөөд байна. Танд өөр санал, гаргалгаа байвал хэл. Дэмжихэд бэлэн байна гэв. 

---