Хөдөлмөрийн баатар, "Гацуурт" ХХК-ийн ерөнхий захирал Лхагвын Чинбатын хэсэг хүмүүсийг Ланд-200 маркийн автомашинаар дайрахаар хөөж байгаа бичлэг өнгөрсөн пүрэв гарагт цацагдсан. Тэрхүү бичлэгт мотоцикльтой нэг, морьтой хоёр хүнийг дайрч унагаж байгаа нь баримтжсан байдаг. 

Сүүлд тодорхой болсноор, тэрбээр 360 орчим тооны адуугаа Дорнод чиглэлээс Сэлэнгэ аймгийн нутаг руу хөөн оруулж иржээ. Улмаар Цагааннуур сумын удирдлагуудын "Голомттой газраас ирсэн учир гарал үүслийн бичгээ үзүүл. Үгүй бол оруулахгүй" гэсэн шаардлагад уурсан тийнхүү машинаар дайрч ална гэж давхисан байдаг. 

Энэхүү бичлэг цахим орчинд тэсэрсний дараа тэрбээр "Манай адууг туугаад явж байгаа малын хулгайч нартай тэмцэж байна. Малын хулгай, хулгайч нар хэрээс хэтэрлээ. Хууль хяналтын байгууллагуудад гомдлоо гаргасан" хэмээн тайлбарласан ч Цагааннуур сумын багийн Засаг даргын яриагаар энэ нь худал болсон. Тэд өвчний голомтоос ирсэн малыг эрүүл бүс рүү нэвтрүүлэхгүй, биднийг малын хулгайч гэлээ хэмээн уурссан байдаг. 

Гэтэл "малын хулгайчдыг элдэн хөөсөн" гэж байсан Хөдөлмөрийн баатар маань Сэлэнгийн цагдаад гомдол өгөхдөө "Төрийн албаны хүнд суртлын улмаас гарал үүслийн гэрчилгээ авч чадаагүй" гэж мэдүүлж, өөрийн "буруу"-г хүлээсэн байдаг. 

Үүндээ бантсан уу, эсвэл өмгөөлөгч, ойр дотны хүмүүсийнхээ үгийг дагасан уу цагдаагийн байгууллагад тайлбар мэдүүлэг хам хум өгчихөөд Алтанбулагийн боомтоор ОХУ руу зугтжээ. 

Цагдаа нарт ч уг 360 адууг тууж оруулж ирсэн улсын харцага Ө.Даваабаатараас тайлбар мэдүүлэг авах шаардлага үүсчихээд байгаа аж. 

Ямартай ч Л.Чинбатад Цагааннуур сумын багийн Засаг дарга болон иргэдийн гомдлын дагуу Эрүүгийн хуулийн гурван ч зүйл ангийн дагуу хэрэг бүртгэлтийн хэрэг нээжээ. Даанч тэрбээр хил даваад зугтчихлаа.

Монгол улс, ОХУ-тай Эрх зүйн талаар харилцан туслалцах гэрээтэй. Иймд цаашид түүнийг Засгийн газрын "Шүүр" ажиллагааны хүрээнд ОХУ-аас "Шувуу" ажиллагааны хүрээнд шүүрч авчрах нөхцөл байдал үүсэхийг ч үгүйсгэх аргагүй боллоо.

---