Мэдээллийн технологи, харилцаа холбооны салбарын хамгийн том арга хэмжээ "ICT EXPO-2023"-ын хүрээнд зохион байгуулж буй “ICT Forum Mindgolia 2023” арга хэмжээ үргэлжилсээр байна. Тус экспод оролцогч БШУ-ын сайд Л.Энх-Амгалангаас боловсролын салбар дахь цахим шилжилтийн талаар тодруулав. 

БШУ-ын сайд Л.Энх-Амгалан:

-Ковидын үед боловсролын салбарт цахим шилжилтийг амжилттай хийсэн улсын нэгээр манай улс нэрлэгдсэн. Хот хөдөөгийн сургууль, төвийн болон алслагдсан сургууль гэх боловсролын чанарын ялгааг арилгахад энэ цахим шилжилт хамгийн гол үүрэгтэй. Хүүхэд хаана амьдардгаасаа үл шалтгаалаад хамгийн сайн багшаар хичээл заалгах боломжтой. Үүний нэг жишээ нь "Мэдлээ" гэх сургууль. Энэ сургууль маань цаашаа улам өргөжнө. Энэ жил 10 мянган хүүхэд суралцаж байна. Хөдөө орон нутгийн хүүхдүүд 10-р ангид ороод хичээл сонгох гэхээр сонгон бүлэг бүрддэггүй тохиолдол их байдаг. Одоо сонгон бүрдсэн бүрдээгүйгээс үл шалтгаалаад цахимаар хичээллэх боломж бүрдээд явж байна.

Төрийн өмчийн сургуульд дэлхий нийтэд хамгийн өндөр технологи, хиймэл оюун ухаанаар хийгдсэн хүүхэд өөрийн сурлагын ахиц, амжилтыг хянадаг платформыг суулгана. Дэлхий нийтэд боловсролын цахим шилжилтийг гурван хүрээнд харж байна. Нэгдүгээрт, дэд бүтцийн асуудал. Интернэт орчин, анги танхим, тоног төхөөрөмжийн асуудлаар хэмжиж байна. Хоёрдугаарт, агуулга. Дан ганц танхим бус алсын зайн сургалт руу шилжинэ. Дараагийн асуудал нь багш нарын ур чадварын асуудал. Манай улсын хувьд төрийн 800 гаруй сургууль шилэн кабельд холбогдсон. Ухаалаг танхим гэх шинэ шийдлийг туршиж үзсэн. 400 орчим сургуулийг ухаалаг анги танхимтай болгоно.

Цаашид ЭЕШ-ыг сургууль, анги танхимаасаа өгөх боломж бүрдэх юм. Гүүгл компанитай хамтраад бид хичээлийг цахим болгож байна. Бүх хичээлийг шинэ технологи суурилсан платформыг хийж туршина. Дэлхий нийтийн хувьсан буй боловсролын чиглэлд манай улс ч анхаарч ажиллаж байна гэв. 

---