ХЗДХ-ийн сайд Х.Нямбаатар Оюутолгойн гэрээний хэлэлцээрийн явц болон “Шувуу” ажиллагааны явцын талаар мэдээлэл хийж байна.

ХЗДХ-ийн сайд Х.Нямбаатар:

-Засгийн газраас 2023 оныг авлигатай тэмцэх жил болгон зарласан. Энэ хүрээнд 5Ш ажиллагааг хэрэгжүүлж байгаа. Миний бие "Шувуу" ажиллагааг нь ахалж ажиллаж байна. Бид анх 92 хүний асуудлыг танилцуулсан. Энэ нь авлига, албан тушаалын гэмт хэрэгт шалгагдаж байхдаа оргон зайлсан, бусад төрлийн гэмт хэрэг үйлдээд мөрдөн шалгах ажиллагааны явцад оргон зайлсан 92 нэр бүхий хүмүүсийг Монгол Улсад авч ирж мөрдөн шалгах ажиллагааг хэвийн үргэлжлүүлэх чиглэлээр ажиллана гэж байсан. Энэ тоо одоо өсөж 127 хүний нэр гарч ирж байна. Тэднийг "Шувуу" ажиллагааны хүрээнд тасралтгүй эрэн хайх ажиллагааг үргэлжлүүлэх, зарим улстай хамтран ажиллаж авч ирэх чиглэлээр ажиллаж байна. Өнөөдрийн байдлаар авлигатай тэмцэх "Шувуу" үйл ажиллагааны хүрээнд интерполын улаан буланд 22 хүн, хөх буланд 70 хүнийг эрэн сурвалжлуулж байна. Үүнээс улаан булангийн 3, хөх булангийн 42 буюу нийт 45 хүнийг олж тогтоосон. Интерполоор эрэн сурвалжилж байсан 47 хүний 25-ынх нь байршлыг илрүүлсэн. Дээрх этгээдүүдийн гадаад паспортын бүртгэлийг улсын бүртгэлийн мэдээллийн санд хүчингүй болгосон. Харин сайн дураараа хэргээ шийдвэрлүүлэхээр 12 хүн ирсэн. Бид нэмж арав орчим хүнийг авч ирэхээр бэлтгэл ажлаа хангаад байна. Авч ирсэн болон сайн дураараа ирсэн хүмүүсийн дөрвийг нь шүүхэд шилжүүлсэн. Үлдсэн 13 хүнийг яллагдагчаар татан шалгаж байгаа.

"Тавантолгой төмөр зам" компанийн гүйцэтгэх захирал асан Н.Удаанжаргалыг Малайзад байгаа нь тогтоогдсон. Тиймээс хууль сахиулах байгууллагууд руу нь бичгээ хүргүүлээд ажиллаж байна. Мөн Ерөнхий сайд асан Ч.Сайханбилэгийг авчрахаар ажиллаж байна. Гэхдээ бид АНУ-д мөрдөн шалгах чиглэлээр ажиллагаа явуулах боломжгүй. Тэр хүнийг санхүүжүүлж байж болзошгүй үйлдлийг шалгаж байна.

Иргэн Г.Ган-Очир гэдэг хүний тухайд би Франц улсын хуулийн байгууллага байтугай франц хүнд ч нөлөөлөх боломжгүй. Г.Ган-Очир гэж хүнд хэлэх ч үг олдохгүй байна. Гэр бүл нь амьдардаг байшингаа шатаах гэж оролдоод зугтсан эрүүгийн хэрэгтэн. Энэ хүний газар гишгэж, гал үлээх хоёроос бусад нь бүгд худал гэв. 

---