Ерөнхий сайд Л.Оюун-Эрдэнэ Монгол Улсын ТОП-100 ААН-ийг тодруулах арга хэмжээнд оролцов.

Монгол Улсын ерөнхий сайд Л.Оюун-Эрдэнэ:

-Монгол Улсын дотоодын нийт бүтээгдэхүүний 74 хувийг бүрдүүлдэг, эдийн засгийн гол хөдөлгөгч хүч болсон баялаг бүтээгчид, аж ахуйн нэгжийн төлөөлөл та бүхэнд баяр хүргэе.

Цар тахлын болон геополитикийн энэ ээдрээт цаг үед улс орон бүхэн өөрийн сул, давуу талыг хэлэлцэж байна. Иргэд, төр, хувийн хэвшил, иргэний нийгмийн байгууллагууд хамтдаа зөвшилцөж байна. Манай улсыг ч энэхүү олон улсын сорилт тойрсонгүй. Эдийн засгийн томоохон сорилттой дэлхий нийт өнгөрсөн гурван жилийн хугацаанд нүүр туллаа. Цар тахлын үед манай улсын эдийн засаг -4.7 хувь хүрч, төсөв 23 хувиар тасарч, олон мянган ажлын байр эрсдэлд орсон. Гэхдээ энэ асуудлыг хамтын хүчээр даван туулж чадсан. Бид 1.3 жилээр эдийн засгаа бүс нутагтаа нээж чадсан. Энэ үед Шинэ сэргэлтийн бодлого мэндэлсэн гэж хэлж болно. 

2020 онд -4.6 хувь байсан эдийн засаг 2023 оны нэгдүгээр улиралд 7.9 хувийн өсөлттэй байна. Нэг хүнд ногдох ДНБ анх удаагаа 5000 ам.долларт хүрээд байна. Улсын төсөв анх удаагаа 1.1 их наяд төгрөгөөр даван биелж, валютын нөөц 3.7 тэрбум ам.долларт хүрээд байна. Мөн экспорт цар тахлын өмнөх түвшинд хүрлээ. 

Эдийн засаг хэдийгээр сэргэж эхэлж байгаа боловч, үнийн өсөлтийн дарамт байсаар байна. Тиймээс цар тахлын хүндрэлийг хамтын хүчээр даван туулсан шигээ үнийн өсөлтийг багасгах энэхүү үйл хэрэгт үндэсний шилдэг 100 аж ахуй нэгжийг хувь нэмрээ идэвхтэй оруулахыг Засгийн газрын зүгээс уриалж байна. Ингэж чадвал Монголбанк бодлогын хүүгээ үе шаттай буулгаж, сэргэж байгаа эдийн засгийн өгөөжийг иргэн, аж ахуй нэгж хүртэнэ. Цалин, тэтгэвэр, тэтгэмжийг үе шаттай нэмэгдүүлэх боломж гарч, иргэдийн бодит мөнгөн орлогод эерэг нөлөө үзүүлнэ.

Мөн Засгийн газраас хэрэгжүүлж байгаа авлигын эсрэг тэмцэлд хувийн хэвшлийн та бүхнийг идэвхтэй оролцож дэмжихийг хүсье гэв. 

---