Өнгөрсөн амралтын өдрүүдэд Буэнос Айрест болсон Бүлэг 20 орны дээд хэмжээний уулзалтын хүрээнд Дональд Трамп, Си Жиньпин нар уулзаж гар барьсан. Дэлхийн хамгийн хүчирхэг эдийн засагтай гүрнүүдийн худалдааны дайн түр намжихаар болсонд нийтээрээ баяр хүргэн алга ташжээ.

Удирдагчдын харилцан зөвшилцлийн дараа шинэ долоо хоногийн эхэнд Азийн хөрөнгийн бирж сэргэсэн үзүүлэлттэй байна. Хятадад Хонконгийн Хан Сен индекс 2,7 увиар өссөн бол Шанхай Композит индекс 2,9 хувиар, Японы Никкей 225 индекс 1,4 хувиар өссөн байдалтай хөрөнгийн бирж нээджээ.

Талуудын харилцан зөвшилцөл дэлхийн эдийн засагт харьцангуй дулаан уур амьсгал авчирсан ч шинжээчид төдийлөн итгэлтэй бус байна. Учир нь “их гүрнүүд бүрмөсөн санал нэгдээгүй, энэ бол түр зуурын гал зогсоох явдал, эрсдэл хэзээд бэлэн” гэсэн тайлбарыг эдийн засгийн шинжээчид өгч байна.

 

 

Америк, Хятадууд харилцан бараа бүтээгдэхүүнүүдийнхээ татварыг нэмж, нэгнээ буруутгасан. Өнгөрсөн амралтын өдөр Аргентинд хийсэн тохиролцоогоор Вашингтон Хятадын бараа бүтээгдэхүүнд тавьсан татварын хэмжээгээ ирэх гурван сарын хугацаанд өөрчлөхгүй. Хэрэв энэ хугацаанд талууд зөвшилцөлд хүрэхгүй бол 10 хувийн татвар 25 хувь болж нэмэгдэнэ гэжээ.

Мөн талууд худалдааны дайны эхлэл болсон технологийн шилжилт, оюуны эрхийг хамгаалах, цахим хулгай зэрэг асуудлыг нэн даруй гэрээ хэлэлцээрийн замаар шийдэхээр санал нэгдэв. Бусад өргөн хэрэглээний бараа бүтээгдэхүүний наймаанд тэгш бус харилцааг бууруулна гэжээ.

Эдгээр харилцан зөвшилцсөн асуудлууд өнгөрсөнд хамаагүй, ирээдүйн үйл хэрэг юм. Өөрөөр хэлбэл нэгэнт нэмэгдсэн татварыг дахин өөрчлөхгүй, харин цаашид дахин нэмэгдэхээс сэргийлсэн үйлдэл гэжээ.

 

Эх сурвалж: www.bbc.com

---