Хан-Уул дүүргийн Засаг даргын захирамжаар барилга, дэд бүтэц, барилгын түр хашааны стандарт хангуулах, хүнс, худалдаа, үйлчилгээ, аялал жуулчлал, байгаль орчин, хог хаягдал, гадна тохижилт, орчны аюулгүй байдал,нийтийн эзэмшлийн зам, талбай чөлөөлөх үндсэн таван чиглэлээр ажлын хэсэг хяналт, шалгалтын ажлыг үе шаттай хэрэгжүүлэн ажиллалаа.

Тодруулбал барилга угсралтын үйл ажиллагаа явуулж буй 20 аж ахуй нэгжид зөрчил дутагдлыг арилгуулах тухай Улсын байцаагчийн хугацаатай үүрэг даалгавар өгч, Наадамчдын зам, Нисэхийн зам дагуу автобусны буудалд явган хүний зам дээр байршуулсан өнгө үзэмжгүй, хог хаягдал ихээр үүсгэж буй гарал үүсэл хадгалах нөхцөл тодорхойгүй бэлэн бүтээгдэхүүн худалдаалж буй 71 түргэн үйлчилгээний цэг, 10 дугаар хорооны нутаг дэвсгэрт 22 гараашийг чөлөөлөн иргэдийн эрүүл, аюулгүй орчинд амьдрах эрхийг хангаж, стандартыг хэрэгжүүлэв.

Түүнчлэн хур болон үүсмэл, түүвэр хог хаягдлыг цэвэрлэх бүх нийтийн их цэвэрлэгээг зохион байгуулж Засаг даргын дэргэдэх 31 албаны 160 гаруй албан хаагч, дүүргийн нутаг дэвсгэрт үйл ажиллагаа явуулдаг 1025 аж ахуй нэгж, 134 сууц өмчлөгчдийн холбоодын 1851 ажилтан, иргэд оролцож 135,616 м2 талбайгаас 34 тонн хог хаягдал цэвэрлэж орчны бохирдол арилгаж, их цэвэрлэгээнээс гарсан хог хаягдлыг хог тээврийн дөрвөн байгууллага ачиж тээвэрлэн төвлөрсөн цэгт хүргэж ажиллалаа.

Мөн Ажилчны гудамж, Үйлдвэрийн гудамж дагуу таггүй 35, Наадамчдын зам дагуу 85 гэрэлтүүлгийн шонг тагжуулж, ил гарсан 311 метр кабелийг аюулгүй болгон орчны аюулгүй байдлыг хангуулан ажилласан байна.

---